Seizcin aenmbwn ciemhciemh bienq raeuj, fanh faed ndiusingj, dwg bi ndeu ndawde aen geiqciet ceiq ndei ndeu. Danhseih, seizcin hix dwg aen geiqciet“rumnywj didngaz, bak bingh fukfat” ndeu, ndigah aeu haeujsim baujgen ciengx ndang cijndaej.

Seizcin ciengx yiengz naek youq ciengx daep. Yienhdaih yihyoz yenzgiu ndaej rox, simcingz mbouj ndei yungzheih hawj heiq daep saekdimz mbouj doengswnh, hawj sinzgingh neifwnhmi hidungj goengnaengz fanzluenh, rengz dingj bingh doekdaemq, yungzheih yinx- fat baenz bingh cingsaenz、bingh daep、bingh sailwed sim uk、binghganjyenj daengj. Ndigah, seizcin wnggai haeujsim baujciz simcingz vaiqvued hailangh, hawj heiq daep doengswnh, hwnj daengz fuengzbingh baujgen cozyung.

Seizcin ciengx yiengz hab gwn diemz siuj gwn soemj. Seizcin dwg aen geiqciet daep hoengh ndeu, gwn soemj daiq lai rox hawj aen’daep hwnjhuj, sieng daengz aendungx. Wng lai gwn di gijgwn feih diemz caemhcaiq hamz danbwzciz、dangz、veizswnghsu caeuq gvangvuzciz lai ndeu, lumj nohcing、gyaeqbit gyaeqgaeq、cijvaiz、dangzrwi、gij huq aeu duh guh、byaekheu singjsien、lwgmak daengj.

Seizcin ciengx yiengz wng swnhriengz aenmbwn. Aenvih seiz- cin aenmbwn bienqvaq mbouj dingh, rwd nit rwd ndat, gyahwnj seizdoeng vunz daenj buhvaq lai, baiz ok goengnaengz haemq nyieg, mbouj ndaej vaiqvet diuzcez ndangraeuj. Danghnaeuz daenj buhvaq mbang lai, loq mbouj siujsim couh ganjyenj baenzbingh. Bouxcungnienz caeuq bouxlaux baenz hezyaz sang、baenz binghsimdaeuz engq aeu haeujsim fuengz nit bauj raeuj, yawhfuengz baenz mauhfung、baenz bingh- simsaek.

Seizcin ciengx yiengz naek youq lienhndang. Vunzraeuz wnggai gaengawq aenndang sihyau, senj guh mbangj hanghmoeg daeuj lienhndang, lumj youzbyaij、menh buet、guh cauh、cuengq yiuhrumz、dwkgiuz daengj, roxnaeuz bae gaenh gyauhgih、funghgingjgih cetyouz. Baenzneix mboujdanh ndaej hawj simcingz hailangh, caemhcaiq ndaej hawj heiqlwed doengswnh, daezsang goengnaengz aensim aenbwt, hawj aenndang lai miz rengz, noix baenzbingh.