Vihliux loegvaq seiqhenz soujfuj caeuq gung guzgan hongndoengfaex, Veiz Gozcingh lij genyi gyoebbaenz aen doihsonyinx hongndoengfaex, ndaej daengz gyoengq dungzci goengdaeuz wnq Swcigih Dangjveij、Cwngfuj doengzeiq. Daj Duh’anh daengj geij aen yienh vunz lai ndawde genj mbangj bouxbing duivuj fuzyenz haenx daeuj guh vunzhong.

Bi 1964 nienzco ngamq laeb- baenz seiz aeu le 200 vunz gonq, gvaqlaeng demgya baenz 500 vunz. Aen doih neix ciuq minzgingj daeuj doiqdaih, youz linzyezdingh ok ngaenz ciengx caeuq baij vunzcaihhangz bae sonyinx, anbaiz canghson son gij cihsiz gohyoz hongndoengfaex hawj gyoengqde, caemhcaiq guh gij sizcenj cauh ndoeng loegvaq, hawj bang bouxbing duivuj neix yaengyaeng bienqbaenz gij vunzcaiz miz itdingh cihsiz dinfwngz hongndoengfaex haenx, gvaqlaeng baij hawj gij gihgou hongndoengfaex gak gaep daengx gih yungh roxnaeuz baij dauqma lajmbanj guh boux guzgan dinfwngz hongndoengfaex. Doengzseiz, lij giva leihyungh bae ligliengh neix banh gij dieg Liengzfunggyangh baenz aen “Suendoenghgo Dieg Baihnamz” ndeu, youz linzyezdingh cawjbanh, sojmiz gij faexloih cungj dawz daeuj gizneix ndaem, caemhcaiq yinxhaeuj gij faexloih yayezdai diegrog, hawj de bienq baenz aen suen gofaex yayezdai ceiq hung daengx guek ndeu. Doihsonyinx Hongndoengfaex laebbaenz ndaej song bi lai nanz gvaqdaeuj, ndaem faex cauh ndoeng 3 fanh lai moux, ganq golwg 90 lai moux, guh ok le gung’yen hawj gij hong loegvaq Liengzfunggyangh、Cinghsiusanh、Vujsienglingj caeuq Roen Yunghvuj、Roen Yunghvuz daengj dieg haenx. Hojsik youq mwh “vwnzgwz”, aen doih neix deng laih dwg aen “bingdoih yilinzginh” Veiz Gozcingh gauj bingbienq ndeu. Seizhaenx, Swcigih Dangjveij mbouj ndaej cingqciengz guh hong, Veiz Gozcingh ndwn gvaq henz bae, Doihsonyinx Hongndoengfaex caengz guh baenz hongdaengq cix deng ceksanq liux bae lo. Doeklaeng, daih dingzlai vunzhong aendoih neix, cungj bienqbaenz bouxguzgan hongndoeng- faex lo.

(caengz sat)