Daxbuz gou gig boihseiz, daengx ciuhvunz youq ndaw laepyamq gvaq ndwenngoenz.

Daxbuz gou gig bingzciengz, bingzbingz ciengzciengz gvaq ciuh- vunz ndeu.

Dingqgangj daxbuz caet bi seiz, miz baez ndeu guhcaemz, mbouj siujsim deng gij nongdoeg doenghgo ndik deng lwgda, seizhaenx dwg ngeihcib sigij 30 nienzdaih, ywbingh diuzgen ca, caemhcaiq ndaw ranz gungzhoj mbouj ndaej yw, fouqda daxbuz couh mengz lo.

Daxbuz maj ndaej sangreux, dwg boux vunz gyaeundei ndeu, hojsik fouqda mengz, ndigah baenzsau le hix mbouj haq. Bohmeh daxbuz vih de ngoenzlaeng miz vunz ciengxlaux, aeu daeglwg iq 8 bi ndeu daeuj hawj daxbuz guh lwgciengx, daeg’iq neix couhdwg daxboh gou. Mbouj geij bi, bohmeh daxbuz laebdaeb gvaqseiq, daxbuz mehlwg cijndei doxbaengh gvaq saedceij.

Ngeihcib sigij 70 nienzdaih co, dou seiq beixnuengx laebdaeb okseng. Seizhaenx, daxboh dou youq rog guhhong, cienzhong gig noix, ngamq gaeuq de boux ndeu gwn yungh. Daxboh aen singhgiz cij ndaej dauqma ngoenz ndeu, hongranz hongrog cungj bang mbouj ndaej gijmaz, aen rap naek gyaranz haenx couh cienzbouh ap youq gwnz mbaq daxbuz caeuq daxmeh. Daxmeh boux dog guhhong aeu goengfaen ciengx roek boux vunz, bibi gwn mbouj imq daenj mbouj raeuj.

Banhaet mbwn caengz rongh, daxmeh couh hwnqmbonq bae rap raemx saeg buh, yienzhaeuh riuj dingj souhsaw okdou bae, nyaengq sat hong ndaw swnghcanjdui, youh hwnj bya bae aeu fwnz gvej haz, roxnaeuz bae gip makndoeng byaekndoeng dauq hawj dou gwn. Gyangngoenz daxmeh mbouj ndaej yietnaiq saek seiz, mbwn laepdingh cij ndaej haeuj ranz, hongranz cienzbouh vut hawj daxbuz damengz gou.

Moix haet gaeq haen daihngeih baez, daxbuz couh hwnqmbonq daem haeux, doeklaeng cawj rek souhsaw hung ndeu, rek souh neix dwg gijgwn daengx ranzvunz dangngoenz haenx, rek souh neix daxbuz itdingh youq daxmeh bae guhhong gaxgonq cawj ndei, yienghneix daxmeh gwn gvaq le youh ndaej daiq souh bae guhhong. Daxmeh okdou le, daxbuz couh lumh- mo baet ranz、daenj buh bwnq souh hawj gyoengqdou……Daxbuz ciengz- ciengz dwg aemq boux ndeu, umj boux ndeu, lij miz song boux youq ndenndang gveujletlet dem.

Seizhaenx, moix geubuh daxbuz baihlaeng cungj dwg vaih ceiq vaiq, neix couhdwg seiq beixnuengx dou youq gizde foekfan cauhbaenz.

Reihnaz faen daengz hoh le, haeux gaeuq gwn lo, ndaw ranz ciengx mou ciengx bit gaeq, hongranz engq lai engq naek lo, faeg byaekmou、cawj byaekmou、gueng mou、gueng bit gaeq，daxbuz yienghyiengh cungj guh.

Daj iq gou couh geizheih: Daxbuz damengz de youq ndaw ranzgaeuq dou byaij baedauq soqlaiz mbouj daemj deng gijmaz, roxnaeuz deng laemx gijmaz, daegbied dwg faeg byaek- mou, boux youq nden yawj cungj vih de yousim, lau fwngz de deng cax raemj sieng, hoeng, daxhuz soqlaiz mbouj deng gvaq, neix sawj gou boiqfug raixcaix.

Couh yienghneix, daxbuz caeuq daxmeh boux ganq ndaw boux ganq rog guhdoih cauxgya cauxdangq. Daxbuz gaenxguh mbouj lau haemzhoj neix sawj dou seiq beixnuengx daj iq couh hag baenz aen sibgvenq gwnhoj naihhaemz.

Ranz gungz saedceij hoj sawj dou engqgya hauqgingq bouxgeq, miz byaekndei cungj dajciengj nip hawj daxbuz gwn, miz aenmak naeddangz hix hawj daxbuz gwn gonq. Daxbuz caeuq daxmeh hix doxhuz raixcaix.Doeklaeng, daengz daxboh duiyouh ma ranz, daxbuz cij ndaej yietnaiq mbouj yungh guh hongranz.

Miz vah naeuz: Dangboh dang- meh le cij rox ciengx lwg hoj. Doeklaeng dou baenzranz baenzgya、dangboh dangmeh le, engqgya roxnyinh gij sinhoj daxbuz. Miz baez ndeu, gou bang daxbuz roi gyaeuj, yawj byoemhau daengx aengyaeuj de, gou ndaeng soemjsepsep, naeuz: “Dou seiq beixnuengx cungj dwg youq gwnz baihlaeng mwngz majhung, daxbuz ceiq sinhoj lo.”

Daxbuz riunyumnyum naeuz: “Hoj dwg hoj, hoeng, gou sim’angq ne.”

Gou youh naeuz:“Danghnaeuz daxmeh noix seng boux ndeu song boux, daxbuz hix mbouj baenzlai sinhoj lo.”

“Gou lij yiemz meh mwngz seng noix ne.” Daxbuz naeuz.

“A……”Gou bak ajloengloeng mbouj rox gangj maz ndei.

Caencingz hawj daxbuz damengz gou guh sat gij saeh mbouj bingzciengz haenx; caencingz hawj daxbuz giengiengz; caencingz hawj aen ranz gungzhoj haenx cangrim angqyangz caeuq vuenyungz.

Daxbuz gyaeu ndaej 86 bi. Daxbuz gvaqseiq ngoenzhaenx, dax- meh daej dwk mbei yaek dek bae, de daej lwnh vunz nyi, geijcib bi daeuj, daxbuz baenzlawz ciuqgoq de, bang de daiq lwgnyez, bang de guh hongranz. Gyoengqvunz youq nden haenx dingq le, bouxboux gamjdoengh dwk raemx- da doekbyoebbyoeb. Gou ndawsim naeuz: Daxbuz, mwngz ndei byaij ba, ciuhlaeng gou lij guh dahlan mwngz……