Daj bi’gvaq 12 nyied 19 hauh daengz bineix 1 nyied 30 hauh,“Cungzcoj Si Byaraiz Vehdat vwnzva gingjgvanh sinhbau seiqgyaiq vwnzva yizcanj—daizheiq hung henzguek·ngoenzngoenz yienj—boq、 beng、daz、 ciengq‘siengj yienj mwngz couh daeuj’ buek gvangjcangz vwnzyi vanjvei yienjok hozdung” youq ndaw singz Cungzcoj yienj. Neix dwg aen si neix daih’it baez baengh“daizheiq hung henzguek·ngoenzngoenz yienj”gvangjcangz vwnzyi vanjvei aen vwnzyi bingzdaiz vunzlai camgya neix gaihcanj Byaraiz sinhyiz senhconz hozdung, doenggvaq“vunzlai camgya”daeuj hawj Byaraiz sinhyiz lai miz yingjyangjliz, hawj vunzlai lai cihciz.

Boq、beng、daz、ciengq‘siengj yienj mwngz couh daeuj’buek yienjok hozdung neix aeu Byaraiz sinhyiz guh cawjdaez, ciuq le gij hozdung senj vunz seizneix gig hwng de. Aen daizheiq neix hai hawj vunzlai daeuj, mboujguenj bouxsai mehmbwk bouxgeq lwgnyez cungj ndaej bauqmingz camgya. Byaujyenj yungh gij hingzsik vunzlai maij yawj gyaez dingq de daeuj yienj, baugvat eu fwen、meijsingh、doengsug、minzcuz daengj ciengqfap caeuq giyoz byaujyenj、diuqfoux、cungh siuj hagseng cienmonz“gangj gojdaez Byaraiz”daengj. Doenghboux ndawbiengz siengj youq gwnz daizheiq gvangj- cangz yienj saek baez nei, cijaeu doenggvaq bauqmingz caeuq doxdax liux ndaej senj hwnj, couh ndaej hwnj daiz bae yienj. Hozdung geizgan, aen si neix senj gizdieg vunz lai de, moix cou yienj 1 daengz 2 ciengz, gungh yienj 6 ciengz.

(Liuz Cinghgveiz)