Moix bi ndwencieng coit, gingciengz cungj dwg youq laebcin gonqlaeng, ndigah, gyoengqvunz heuh ngoenz neix guh ndwencieng. Daengz cieng le, couhdwg gangj seizcin yaek daengz lo, youh baenz doek ceh doek gyaj lo, dou youh maj hung bi he lo, ndaw biengz doenghgo doenghduz cungj ndiusingj lo.

Daengz cieng le, gya’gya hohhoh bakdou cungj nem fouqdoiq, venj daengloengz, nem cih “fuk”. Miz vunz youq gwnz ciengz nem nienzveh; boux fwngzriengj aeu geuz raed va nem conghcueng…… Daengz cieng le, gya’gya hohhoh cungj cuengq bauq, bingbing bangbang yiengj mbouj dingz, gyoengq vunz soengq gaeuq coux moq…… Cienznaeuz, “cieng” doiq vunz gig mbouj gitleih, “cieng” baez daeuj faex couh mbaw loenq, nywj roz daimued; “cieng”baez gvaqbae doenghgo doenghduz youh maj hoenghfwdfwd, va hai rim biengz. Baenzlawz gyaep “cieng” deuz ne? Baenzlawz cij naengz hawj vunz gvaq ndaej vaiqvued miz gwn miz daenj ne? Gyoengq vunz couh cuengq bauq gyaep “cieng” deuz, aenvih “cieng” lau hoengz, caezgya couh nem doiq venj daengloengz, yienghneix gyoengq vunz couh ndaej gvaq saedceij vuenyungz lo.

Ndwencieng daengz lo, neix dwg ngoenzndei cietndei, engq dwg ngoenz vunzcaen doxcomz. Vunz baekfueng gwn gyaujswj, vunz namzfueng gwn faengx gwn nienzgau, caezgya cungj angq dangqmaz. Ndwencieng daengz le, bouxlaux lwgnyez cungj daenj buhmoq, bouxlaux aeu hawj leixseih hawj lwgnyez. Daengz cieng lo, gya’gya hohhoh cungj cawx haujlai doxgaiq gvaq cieng, cungj angqyangz neix, mboujdan dwg ndaw ranz angq, daengx gai daengx mbanj cungj angqfwdfwd, gyoengqvunz miz di foux saeceij, miz di cuengq bauq, miz di ciengqgo diuqfoux……

Langh da yawj bae, ndaw singz lajmbanj, nauhyied dangqmaz! Daengz cieng lo, bi moq youh yaek hainduj lo.(Lungz Cunh)