Ndwencieng dwg ngoenzciet conzdungj Cunghvaz minzcuz raeuz, baez daengz ciengz,bi he youh gvaqbae lo, bi moq youh daeujdaengz lo. Baez daengz cieng, ranz ranz cungj nauhyied dangqmaz. Doengzseiz, ndwencieng hix miz haujlai hozdung gig mizyinx.

Daengz cieng miz gienh saeh he moix boux cungj aeu guh, couhdwg cuengq bauqva. Haemhndaep faen cung ceiq doeksat, ranzranz cungj cuengq bauqva bongh hwnj mbwn hwnj fwj bae, sing bauq yiengj dwk rwz cungj yaek nuk bae. Bauqva youq gwnzmbwn dek hai youh angj youh lwenq, lumjbaenz vad fwngz coh gou hemq ndei. Gyoengq nyez iq dawz gij diuzbauqva vad bae vad dauq veh ok gij doz gyaeundei, guhcaemz guh’angq angqhoh bi moq daeujdaengz.

Haemhndaep, daengx ranz vunz caez naengh aen congz he, doq yawj cunhcez lenzvanh vanjvei doq lwnhgoj, caezgya angqfwdfwd. Gyoengq lwgnyez saetsaet diuqdiuq buet daengz dangqnaj vunzhung goenggingq dwk naeuz:“Goengheij fatcaiz, aeu leixseih daeuj.”Dangyienz gyoengq vunzhung caeux couh bwh ndei leixseih lo, gyoengqde fat leixseih hawj lwgnyez, hoh lwgnyez daengx bi bingzan ndangcangq.

Cieng coit banhaet, haujlai vunz caeux- caeux couh hwnq lo, cawx huqlaex bae ranz caencik baengzyoux cunz ranz. Deng lo, gyoengq lwgnyez hix ceiq gyaez cunz ranz, aenvih, gyoengqde youh ndaej sou leixseih lo. Gak gya gak hoh doxcunz baiqcieng, ndaej demlaeg gamjcingz, hix ndaej sou aeu gij hohfuk ndei, sawj mwngz bi moq seizheiq ndei.

Ndwencieng dwg aen ciet geqlaux he, sawj daengx ranz vunz ndaej doxcomz. Engq dwg bi moq hainduj, dwg naed lwggaet he, naed lwggaet neix couhdwg vaiqvued caeuq vuenyungz.

(Yauz Yizdingz)