Yienh Bujbwz miz aen Yangh Cinlungz, yienzlaiz miz faexdaeqnding 10 lai fanh moux, daih guh gangdiet seiz deng buqvaih yiemzcungq, ginggvaq fung bya hoh faex le, daengz 70 nienzdaih, gij diegriz gaxgonq raemj gvaq haenx hainduj faex mwn baenz ndoeng, seizneix gaenq baenz le aen dieggoek cauh’ok cujyau yunghcaiz cauh ruz Guengjsae ndeu, caemh dwg benq ndoengfaex faex- daeqnding ceiq gvangq daengx guek baez daihngeih maj baenz haenx.

Miz mbangj ndoifwz lai gvangq haenx, swcigih lij buet ok ngaenzcienmonz, aeu feihgih doek ceh cauh ndoeng. Veiz Gozcingh naeuz:“Dij ndaej yungh gij ngaenz neix, bibi youq baihneix roengz di ngaenz, daengzcog yaek miz souhaeuj laux, lwglan caemh rox gyo’mbaiq raeuz.” Feihgih cauh ndoeng youq Ndoengfaex Gvanghsih guh ndaej baenzgoeng gonq, gvaqlaeng youh guhgvangq daengz Ndoengfaex Dagveisanh caeuq gij diegbya baih- saebaek Guengjsae caeuq dieg ndoibya luegdah Dahyougyangh bae. Daj bi 1969 hwnj, gonqlaeng youq 8 aen digih、66 aen yienh (si)、403 aen yangh (cin) caeuq 58 aen dieg- ndoengfaex guekguh gvangqlangh doigvangq, cingzcik yienhda. Youq Ndoengfaex Gvanghsih guh feihgih cauh ndoeng, ginggvaq 25 bi le, gij lienghrom bingzyaenz moix moux gofaex ndaej 25 fanh lizfanghmij.

Ciuq gij fuengcim “daj gyawj daengz gyae、daj ndaw daengz rog” haenx, Swcigih Dangjveij gig yawjnaek gij hong loegvaq Namzningz、Liujcouh、Gveilinz、Vuzcouh seiq aen si neix. Geij boux goengdaeuz cungj faenhong, Veiz Gozcingh gaem hong Namzningz, youz Cinz Yinggih、Lij Yinhdanh bangfwngz, Vuj Cinnanz gaem hong Gveilinz, Ho Hihmingz gaem hong Liujcouh, Anh Bingzswngh gaem hong Vuzcouh.

Veiz Gozcingh doiq gij hong cauh ndoeng loegvaq Namzningz, ca ndaej gig gaenj gig sijsaeq.

Bi 1964 ndwen 3 co, aen ngoenz- singhgiz ndeu, de ciucomz gij vunzgaemhong Namzningz Si、Swcigih Linzyezdingh daengj danvih haenx daeuj hai hoih, cienmonz ngeixyaeng gij vwndiz Namzningz cauh ndoeng loegvaq haenx. De naeuz:“Namzningz dwg soujfuj swcigih, guh hong cauh ndoeng loegvaq wnggai guh ndei daiqdaeuz, hwnjguh soujfuj raeuz baenz aen singz gyaeundei bya heu raemx saw dieg baihnamz bae. Mboujdanh youq ndaw singz guh ndei loegvaq, youq gij dieghenz rog singz caemh aeu guh ndei bae.”

(caengz sat)