Baez daengz ngoenzciet niemh vunzcaen. Daeglinh youq sengj rog aen gunghswh ndeu guh hong. Daeglinh gietdingh bineix ndwencieng dauq ranzmbanj gvaq cieng.

Ngoenz ndwenlab ngeihbet banhaemh caet diemj buenq, Daeglinh caeuq yah lwg hwnj hojceh, yaep he, couh ra ninz lo. Ngoenzlaeng banhaet bet diemj gyoengqde ngamq ndiu. Yo, daj conghcueng yawj baihrog ci bae, mizseiz yawjraen baenz benq dieg byaekva’henj, mizseiz raen daengz baenz aen baenz aen daemz bithaij …… Sam mehlwg itmienh gangjriu itmienh yawj gingjsaek gyaeundei neix. Hojceh lumj duzlungz nei bongh gvaq aen rungh aen ndoi faexmwn, raih gvaq baenz benq ndoenggooij …… Lajbyonghngoenz sam diemj cung couh daengz cehcan ranzmbanj Daeglinh lo. Daeglinh youq gwnz haw cawx ndei faengx、nohlab daengj haujlai doxgaiq, couh dap cisamloek ma ranz.

Daeggo beixsauj raen daeg- nuengx daengx ranzvunz dauqma, angq raixcaix. Songde raen daeglwg Daeglinh gaenq song bi lo, dwggyaez lai, doxlwnz umj hwnjdaeuj, youh umj youh cup, daengx ranzvunz angq dangqmaz.

Gwn caeuz gvaq le, Daeglinh caeuq lwg maex dawz geij aen faengx、cib diuz saejlab、bingjdangz bae yawj Buzloeg. Youq gwnz loh, yah de cam vihmaz bae yawj Buzloeg. Daeglinh naeuz:“Goengbuz gou caeux gvaqseiq, gou ngamq roek bi, couh mbouj miz bohmeh lo, seizhaenx go gou cib bi, dwg daeggo daiq gou hung. Lij ndaej daengz Buzloeg Goengseiq bangcoh dem. Gou bae doegsaw le, Buzloeg ngoenzngoenz aemq gou bae hagdangz, de mbaet gwn mbaet yungh, bang gou cawx doxgaiq sawbouh. Gou doeg cuhcungh sam bi, cienzhag cienz gwndaenj cungj dwg Goengseiq bau hawj. Songde boux miz dahlwg ndeu haq mbanjlaj, ranz song dahgux haenx haemq fouqmiz, Buzloeg Goengseiq ciengz daiq dou bae ranz gyoengqde guhcaemz, caemx raemx gyaeujmboq mbanjlaj ne……”

“Daxbuz, daxbuz, hai dou.” Daengz ranz Buzloeg le, Daeglinh bongx dou heuh naeuz. Yaep he, dou hai lo. “Yo, gou laihnaeuz dwg byawz, dwg Aulinh dauqma,vaiq haeuj ranz, caj yaep ndeu couh ndaej gwn caeuz.” Bawxlan Buzloeg angqcoux gyoengq- de. Daeglinh naeuz:“Dou gaenq gwnhaemh lo, Buzloeg ne?” Lan Buzloeg naeuz: “De bae mbanjlaj gvaq cieng, gaej dwen de lo.” “Daeuj, daeglan, hawj bohlungz umj, cajseiz bohlungz hawj hoengzbau hawj mwngz. Daeuj guhcaemz couh daeuj, mbouj yungh aeu huq daeuj. Gwn caeuz le, sou dauq dawz bae ma……” Naengh ndaej yaep he, Daeglinh naeuz: “Dou baema lo, neix gou hawj Buzloeg 1000 maenz ngaenz, sou bang de dawz gonq.” “Mbouj aeu mbouj aeu, sou dauq dawz huq baema, cienz couh engqgya mbouj bang dawz lo.” Bawxlan Buzloeg duet aen hoengzbau gvaqdaeuj oet haeuj ndaw daeh Daeglinh bae. Gyoengqde nyungj bae nyungj dauq, daeglan caeuq bawxlan Buzloeg boux hawj 100 maenz hawj lwg Daeglinh, cij sou faengx noh. Hoeng, gangj gijmaz hix mbouj haengj bang dawz 1000 maenz ngaenz hawj Buzloeg.

Banhaemh, Daeglinh daengx ranzvunz dawz huq bae ranz Goengseiq. Lwg Goengseiq daengx ranzvunz angqcoux gyoengqde. Liuz- bet got daeglan hwnjdaeuj cup liux youh cup. Daeglinh coenz daih’it couh cam: “Goengseiq ne?” Liuzbet naeuz: “De bae mbanjlaj lo, bae ranz dahlwg gvaqnienz. Daeuj, raeuz sien gwn makdangz gonq. Seizneix gwndaenj ndei lo, laeuj ndei loh ndei, diegyouq seuqsak, yienghyiengh ndei. Ndwenlab ngeihcib caezgya couh suek faengx, ngoenz ngeihbet couh dieb doiq lo. Cajseiz sou dauq dawz faengx noh baema, caiq dawz geij aen faengxgaeuvaiz duh gou baema, yawj cungj faengx lawz lai ndeigwn. Seizneix, mbanj raeuz lienz gaeqhangh hix daenj soij lo……”Vah de nyex ndaej caezgya riuhoho. Aubet hix mbouj haengj bang dawz cienz hawj Goengseiq. Yaep he, Daeglinh gyoengqde baema le, lwg Daeglinh ndaw daeh youh lai miz song bak maenz cienz.

Haemhndaep, vunzmbanj gaj bit gaj gaeq, gaj mou gaj yiengz, caeq goengsix, youq ndaw ranz henz ranz caeqgoeng. Gwn haeux gvaq, doih saeceij couh bae hawj gak ranz gak hoh baiqnienz. Daeglinh gvanbaz hix bae ndaek gyong hawj doihciengqsae ciengq sae. Daengz gyanghwnz, aen- cung hung ngamq naeng cibngeih diemj, gak ranz gak hoh youq gwnz dingjlaeuz diemj cit bauqva, aen dem aen bauqva daiq hohfuk gyoengqvunz biu hwnj gwnzmbwn, hai ok saekhoengz saekhenj, saekaeuj saekloeg, ndeiyawj dangqmaz. Sing bauq naeng ndaej deih daenh mbwn ngauz. Daeglinh caeuq caezgya seiz mbouj seiz bek fwngz daihsing heuh: “Yu, aen neix ndeiyawj lai!” Bauqva naeng daengz gaeq haen sam lij caengz dingz ne.

Daeglinh youq ranzmbanj vaiq- vued gvaq seiq ngoenz cieng le, couh dauq baema gunghswh. Youq gwnz hojceh, Daeglinh ngamq naengh ndei, hojci couh “gunglung gvanglang” hai bae lo. Seizneix, doiqnaj Daeglinh miz doiq gvanbaz ndeu couh daej hwnjdaeuj, daej ndaej gig siengsim. Daeglinh nyaenx mbouj ndaej cam: “Sou miz maz saeh?” Daeg haenx mienh daej mienh gangj: “Gou ngamq sam bi mbouj ma ranz, goengbuz gou couh bae mbanjlaj youq lo……hai!” “Neix youh miz maz, songde youh mbouj dwg gvaqseiq.” “Mwngz mbouj rox bae mbanjlaj lingh miz aen eiqsei ndeu dwg gvaqseiq ha……?” Daeg- linh baez dingq, doeksaet liux:“Ha? Nyaenx gangj Buzloeg caeuq Goeng- seiq gou hix gvaqseiq la?”

Daeglinh gipmuengz yaek soujgih okdaeuj cam liuzbet. Liuzbet daej dwk lwnh de nyi, Buzloeg caeuq Goengseiq youq geij ndwen gonq gaenq gvaqseiq lo. Nyi liuzbet baenzneix gangj, Daeglinh nyaenx mbouj ndaej daej hwnjdaeuj:“Buzloeg Goengseiq caengz ndaej gwn duix haeux ndeu duhgou……!” Yah de caeuq lwg de hix lae raemxda roengzdaeuj.

Caen dwg: Lwglan siengj hauq- swnh, vunzcaen gaenq mbouj lix. Vunz raeuz lij dwg ciengz dauq ranz yawjyawj bouxlaux bw.