Yihyoz yenzgiu ndaej rox, lai gwn rag byaekheu ndaej hawj ndang vunz maenghcangq, ndang vunz lai dingj ndaej nit.

Rag byaekhau: Swiq rag byaekhau seuq ronq baenz benq caeuq hing、coeng baek dang gwn, ndaej yw ngamq baenz dwgliengz seiz lau nit fat ndat、dungx ndat yaem sieng.

Rag lwggwz: Aeu di rag lwggwz、naeng maksigloux ndeu caez ngenz baenz mwnh, moix baez gwn 6 gwz, ngoenz gwn 2 daengz 3 baez, ndaej yw siq nanz mbouj ndei.

Rag byaekginzcai: Aeu 60 gwz rag caeuq mbaw byaekginzcai, 10 aen makdaihcauj caez baek raemx, gwn makdaihcauj caeuq dang, ndaej yawhfuengz doenghmeg giet ndongj.

Rag byaekgep: Rag byaek- gep caeuq mbaw de daem yungz nap aeu raemx, raemxgoenj raeuj soengq gwn, ngoenz baez, aen dan neix hab boux baenz gipsingq cangzyenz、menhsingq haexgaz gwn; aeu di rag byaekgep caeuq dangznding baek raemx gwn, ndaej yw mehmbwk begdaiq lai; aeu rag byaekgep daem yungz baeng gizsieng, ndaej sanq cwk siu foeg、dingz in dingz lwed, caemh ndaej yw laemx sieng.

Rag byaekmbungj: Aeu 120 gwz rag byaekmbungj baek raemx gwn, ndaej yw oksiq; aeu 120 gwz rag byaekmbungj, meiq caeuq raemx gak 250 hauzswngh baek raemx hamz ndaw bak, ndaej yw heuj nengz heuj in.

Rag byaekbohcai: Aeu 100 gwz rag byaekbohcai, 15 gwz dawgaeq baek raemx gwn, ngoenz 2 daengz 3 baez, ndaej dawz daeuj guh ngoenznaengz hohleix boux baenz binghnyouhdangz.

Rag coeng: Aeu 20 go coeng daiq rag, di haeuxsan ndeu caez cawj cuk gya di meiq he swnh ndat gwn (gwn le ok di hanh ndeu ceiq ndei), hab boux baenz gyaeuj in fat ndat gwn.