Gou raen Fan lauxsae boux hozunq lumj meh gou nei gig “gyaeundei”.

Naeuz Fan lauxsae “gyaeundei”, daih’it dwg de daenj buh gig gyaeundei.

Mwh mwngz ginggvaq gyauyoz- louz, yawj aen suenva doiqnaj conghcueng haenx seiz, mwngz cungj naengz yawjraen dah sau gyaeundei he, daenj vunj raez moqsien, gwnz gyaeuj aeu fag geb gyaeuget he geb byoem, riuj aen daeh iq gyaeundei he, cwxcaih dwk youz henz suen, boux haenx, couhdwg boux lauxsae unqswnh dou Fan lauxsae.

Fan lauxsae mboujdanh ndang- daenj gyaeundei, gij doxgaiq de guh hix gig gyaeundei.

Youq ndaw fwngz de, gij gebbyoem guh dwk iqet gyaeuget dwggyaez, gij ceij miz saek haenx, gij cagcouz haenx, gij mae haenx, youq ndaw fwngz de cungj naengz bienq baenz gij doxgaiq gyaeundei hawj mwngz doeksaet.

Yaek gangj gij ceiq gyaeundei Fan lauxsae, lij dwg “sim gyaeundei”.

Moix singhgiz singhgiz sam, miz dangz goq lienh doenghfwngz he, dangz goq haenx cungj dwg dangz goq gou ceiq muengh, aenvih, gou mboujdan naengz youq dangz goq neix hag ndaej haujlai doxgaiq, lij naengz raen Fan lauxsae, ndigah gou cungj gig simhai.

Muengh ha muengh, youh muengh daengz singhgiz sam lo, gou daiq gak cungj mae、caizliuh, angqfwtfwt buet bae veiyisiz, ciengj ndaej aen diegnaengh baiz dangqnaj he, naengh maenhswgswg, hainduj guh“mad lwgnyez”, Fan lauxsae hozraez dwk son:“Sien hot gyaeujmae, seizbienh ra congh he con haeujbae, beng daengz gyaeuj, yienzhaeuh ciuq gij yiengh mad hainduj nyib.”“Yawj cingcuj caengz, gou caiq guh mbat he hawj sou yawj.” De naihsim dwk son. Yaek hainduj guh lo, Fan lauxsae siujsim dwk dawz cim caeuq mae okdaeuj, laebdaeb son, lij daegbied daezsingj naeuz:“Lijmiz, nyib daengz gyaeujmad seiz, geiq ndaej aeu lai nyib geij baez, nyib baez ndeu nyib mbouj maenh law, dingq rox caengz?”“Mingzbeg lo!” Dou saenqsim cibcuk, hainduj guh hwnjdaeuj, yaep he, gou couh bungz daengz aen youh aen vwndiz, yaep he dwg mae cug hot lo, yaep he mae gveuj lo, yaep he nyib loek lo……Moix aen vwndiz, Fan lauxsae cungj fwngz gaem fwngz son gou, gou cimyawj faj naj gyaeundei Fan lauxsae: Laj bwnda goengq- gedged haenx, fouq lwgda ndongq- rikrik, giuzndaeng sangmoj, naeng- bak hoengzfedfed, yawj naj de caem- dingh youh gyaeundei…… Doeklaeng gou caen nyib ndei gouh mad haenx lo.

Gij gyaeundei Fan lauxsae, dwg yienghhaenx doenghvunz, dwg yienghhaenx hawj gou mwhmwh geiq ndaej! Lauxsae ha, gij sienhsoh mwngz, yaek ciengxlwenx youq ndaw sim gou!

(roek nienzgaep Cangh Goh)