Gou dwg duz roeg iq he, gij gyaez daxboh dwg aenmbwn, gou youq ndaw gyaez daxboh mbe fwed mbin; gou dwg duz bya iq he, gij gyaez daxboh dwg aenhaij, gou youq ndaw haij youzlangh.

Daxboh gou dwg goeng lauxsae bingzciengz he, hoeng youq ndawsim gou boh gou dwg gwnz biengz boux boh ceiq hungmbwk he.

Geiq ndaej miz bi he seizdoeng, gou bae hagdangz seiz mbouj daenj buhgoeb, nit dwk saenzdedded, gou nu fwngz dwk ienqhoij mbouj dingq vah daxmeh. Seizneix dingq Vuz Veihveih naeuz:“Maj Funggiz, boh mwngz daeuj lo!” Gou byaij ok gyausiz, cijraen boh gou riunyumnyum, ndaw fwngz dawz geu buhgoeb he, naeuz:“Daeuj, vaiq daenj buhgoeb.” Gou daenj buhgoeb le, raeuj lai lo, ndawsim engq dwg raeujrubrub, daxboh naeuz:“Baezlaeng aeu geiq ndaej lo.” Gou riu dwk ngaek gyaeujdwdwd. Ma daengz ranz, daxmeh dingqnaeuz gou mbouj daenj buhgoeb bae hagdangz, couh ndaq gou, cingq yaek moeb gou seiz, daxboh riuhehe byaij gvaqdaeuj, naeuz:“Lwgnyez mbouj roxsoq, suenq lo.” Gou yawj daxboh, gig docih de, daxboh couhdwg yienghneix hozunq son gou.

Lijmiz baez ndeu, gou youq rog guh saeh loek, ma ranz lij yaeuh daxmeh dem, daxmeh naeuz gou hawj gou hawj najhoengz, daejsoebsoeb. Daxboh raen le gipmuengz bang gou uet raemxda, caeuq gou gangj dauhleix, lij naeuz daxmeh:“Ndaq lwg hoenx lwg mbouj son ndaej lwgnyez ndei ne, aeu gangj dauhleix hawj gyoengqde. Gyoengqde lij iq ne.”Daxboh gangj haujlai dauhleix hawj gou, gou simfug nyinh loek lo.

Gou ngoenz hung gvaq ngoenz, roxyiuj aeu docih bohmeh. Gou rox mwh bohmeh baegnaiq seiz daek cenj caz he hawj gyoengqde; gwn ngaiz sat le, hawj bohmeh yietnaiq, gou swiq duix.

Gou miz boux daxboh ndei ndeu, de hawj gou rox gijmaz dwg gyaez. Gou youq ndaw gyaez majhung, ndawsim miz aen daeng he rongh dwk, ciuqrongh diuzroen ciuhvunz gou.

(ngeih nienzgaep Maj Funggiz)