Bi 1964 seizcin, Veiz Gozcingh bae daengz Gvangjcouh camgya aen Hoih Cunghnanzgiz, lohgvaq Cangyangh seiz, daegeiq cingj gij goengdaeuz diveij Can’gyangh gaisau gij gingniemh gyoengqde ndaem faex guh loegvaq haenx hawj de nyi, caemhcaiq ngonzyawj le gij loegvaq ndaw si caeuq diegfaex henzhaij. Dauqma le, de hwnjheiq senhconz caeuq doigvangq ciuq gij saehsaed bonjdieg bae okmaeuz daih guh vunzlai ndaem faex caeuq caijyungh buenzyingzyangj ganq miuz gij gingniemh senhcin neix, hawj gij hong cauh ndoeng loegvaq Guengjsae haenx guh ndaej engqgya maenhsaed.

Ginggvaq bi dam bi lienzdaemh cauh ndoeng, haujlai ndoifwz byandoq daengx gih cungj ndaej goemq geu buhheu gvaq. Canghvuz Yen baihhenz miz aen Ndoilungzheux, dieg gvangq daih’iek 1.5 fanh moux, aenvih gwnz bya faex nywj noix, namhraemx laesaet youqgaenj, gyonj miz 1500 lai giz lueg, diuz Dahhozgaeq gvangq 3 maex、raez 4 goengleix ndeu cienz- bouh deng namhsa dienz doh, naz deng gyan daihgaiq 3000 moux. Gvaqlaeng ginggvaq lai bi lienzdaemh ceiqleix, fatdoengh vunzlai buen namh hwnjbae bae ndaem faex cauh ndoeng, guh gofaex mbawcim、gofaex mbawhung doxgyau ndaem, ndaem deihdindin, yungh buenz (gyaiz) yingzyangj ganq miuz, mbwn rengx rwed raemx, gyagiengz guenjhoh, dauqdaej bauj ndaej namhraemx lo, hawj gij ndoifwz byandoq、luegdah mbaetraemx、ndoibya naedrin dauq- cungz ndaej maj doh gofaex, gig lai nazhaeux youh ndaej dauqcungz ndaem lo. Veiz Gozcingh gingciengz yungh Ndoilungzheux guh laeh, son’gyauq ganbu aeu yawjnaek ndaem faex cauh ndoeng.

Youq guh vunzgoeng cauh ndoeng doengzseiz, gak gaep cwngfuj lij youq gij dieg faexlwg baenzbenq、gij dieg faexmeh raemj le ce roengz haenx、gij dieg faexraemxgoek deng buqvaih gvaq haenx, daihlig doihengz fung bya hoh faex. Gij dieg fanzdwg fung bya hoh faex haenx, gofaex haemq vaiq cix majhung lo. Songhenz Dietloh Siengh-Gvei Cenzcouh daengz Lingzconh haenx, 60 nienzdaih deng gozdingh baenz gij dieg fung bya hoh faex cungdenj gocoengz- riengmax, gofaex maj ndaej haemq mwn, doeklaeng baenz le aen dieg- goek cauh’ok iengcoengz youqgaenj Guengjsae ndeu. Veiz Gozcingh baez- baez naengh cifeiz lohgvaq gizneix, cungj haemq haeujsim gij bienqvaq gaiq diegfaex neix, de naeuz: “Fung bya hoh faex gig youqgaenj, miz ndoengfaexmeh le, caiq fung bya hwnjdaeuj, mbouj yungh geijlai bi, gij faexlwg cix haemq vaiq majhung lo.”

(caengz sat)