Seizneix, moix baez raen gyoengqvunz cawx va ndaem va, gou couh siengj daengz Siujmeiz——dah hagseng lajmbanj gou ngamq dang lauxsae seiz bungz daengz haenx, de gyaeundei youh dwggyaez, mboujgvaq, gou sij de mbouj dwg aenvih de gyaeundei, hix mbouj dwg aenvih de dwg hagseng ndei. Dwg vihmaz? Dwg aenvih de ceuqleuz, lijdwg aenvih de bang gou ndaem go va’gut haenx ne? Gou naemj, cungj mbouj dwg. Seizneix gou hix gangj mbouj cingcuj lo.

Gou dawz Siujmeiz hwnjsim, dwg gou daj swhconh bizyez bae daengz aen hagdangz cuhcungh lajmbanj hwnj dangz go daih’it haenx. Dangz go haenx miz lingjdauj daeuj dingq go, gyoengq hagseng cungj miz di simndum, mboujgvaq lij ndei, baihnaj cam gyoengq hagseng vwndiz seiz, gyoengqde cungj han ndaej haemq ndei, mbouj miz gijmaz loek, yawjdaeuj mbouj miz maz saeh lo, gou soeng liux gaemz heiq he. Byawz rox, mwh yaek roengzdangz, miz boux hagseng ndeu daezok aen vwndiz gig nanz ndeu, daengx ban sikhaek caemliklik, gou baenzlawz yinx gyoengqde, gyoengqde hix dap mbouj ok. Gou cingq mbouj rox baenzlawz guh seiz, miz dah hagseng ndeu gingz fwngz ndwn hwnjdaeuj, de dap ndaej gig deng, vah youh mizyinx, gangj dwk sawj gyoengq lingjdauj lauxsae riu hwnjdaeuj. Yienghneix, dangz go neix youq ndaw sing riu gyoengq vunz roengzdangz lo.

Dah hagseng haenx couhdwg Siujmeiz！

Siujmeiz gwn ndaej haemzhoj, de gig roengzrengz doegsaw. Youq baez daih’it gaujsi, de couh gauj ndaej daengx ban daih’it. Gou youq gwnz ban daegbied haenh de, lij gangj le haujlai dauhleix naeuz ranz hoj lwg okcot haenx. Hoeng, gvaqlaeng miz hagseng lwnh gou naeuz, ranz Siujmeiz mboujdan mbouj hoj, lij gig miz ngaenz dem, boh de youq rog guh seng’eiq, ranz miz ngaenz baenz bak lai fanh. Ndaw ranz fouqmiz youh yienghhaenx gwnhoj, seizneix lij miz geijlai boux hagseng yienghneix dem ?

Daj seizhaenx hwnj, gou engq yawjnaek Siujmeiz lo. Gou raen Siujmeiz cozvwnz sij ndaej mbouj loek, gou couh ciengzseiz dawz cozvwnz de bae ndaw ban doeg hawj gyoengq hagseng dingq.

Bingzseiz, Siujmeiz hix gyaez bae fuengz gou ciq saw yawj, lij linghvaih sij cozvwnz hawj gou gaij.

Ngoenz ndeu, Siujmeiz lij daiq go vagut ndeu daeuj ndaw fuengz gou, youq gyanghongh ndaem. De lwnh gou naeuz:“Lauxsae, vagut dwg go va gwnz ndoi ceiq yungzheih lix ndeu, mboujlwnh mwngz ndaem youq gizlawz, de cungj lix, gou ceiq maij vagut lo.”

Mwh cuengqhag seiz, Siujmeiz ciengzseiz daeuj coengh gou ganq go vagut haenx, de mbouj cinj gou ganq, naeuz gou mbouj rox ganq, guh mbouj ndei lij rox “gaj dai” vagut dem, gou daejriu mbouj baenz, cijndei dingq de.

Mwh seizcou daengz lo, vagut hai le haujlai va, hoengzmaeq hoengzmaeq bae, gig ndeiyawj.

Ngoenz ndeu, Siujmeiz sij cit sei 《O, Vagut》neix hawj gou yawj, gou roxnyinh sij ndaej mbouj loek, couh son de gaij le geij giz, lij coengh de geiq bae hawj bause, mbouj siengj daengz, caen ndaej fatbiuj lo. Daj haenx hwnj, de engq gyaez yawj saw, engq gyaez sij cozvwnz lo. Gij suijbingz sijcoz de hix ndaej cinbu haujlai. De couh ciengzciengz daibyauj hagdangz bae camgya cozvwnz doxdax, hix ciengzciengz ndaej ciengj.

Youh daengz mwh seizcou, gou daiq Siujmeiz bae digih camgya cozvwnz doxdax. Doxdax sat le, gou cam Siujmeiz sij ndaej baenzlawz yiengh, de naeuz roxnyinh haemq ndei, ndaej ciengj mbouj rox bw. Yienghneix, dauq daengz hagdangz le, de ngoenzngoenz daeuj cam gou cozvwnz doxdax bingz ciengj mbouj caengz.

Byawz rox, caengz rox bingz ciengj baenzlawz yiengh, miz ngoenz ndeu, Siujmeiz mbouj daeuj hagdangz lo, cam gyoengq doengzhag caemh vunz mbanj de cij rox, de naeuz ndaw ranz miz saeh, gaenq cingjgyaj bae ranz lo. Neix dwg de baez daih’it cingjgyaj, gou siengj de gig vaiq couh dauq hagdangz ba, hoeng, haujlai ngoenz gvaqbae, lij caengz raen de ma, mbouj rox dwg vihmaz.

Cingq youq gou yaek bae ranz Siujmeiz yawj seiz, cij ndaej dingqnyi aen siusik yak he: Daxboh de youq baihrog guh seng’eiq canh ndaej haujlai ngaenz le couh yiemz daxmeh Siujmeiz geq, youh naeuz de cij seng lwgmbwk, couh youq baihrog aeu dah sau lengj he guh yahnoix, geij ngoenz gonq dauq ranz caeuq daxmeh de lizvunh, youh yiemz Siujmeiz dwg lwgmbwk, vut de hawj daxmeh de, daxmeh de siengsim dangqmaz, couh gwn ywnungzyoz baembwn lo, Siujmeiz raen yienghneix hix couh riengz gwn ……

Youh gvaq le geij ngoenz, gou sou ndaej fung saenq ndeu, ndaw saenq miz mbaw cwngsuh ndaejciengj ndeu, dwg bien cozvwnz Siujmeiz ndaej itdaengj ciengj！

Ngoenzhaenx cuengqhag, gou bae daengz aenmbanj Siujmeiz, youq dangnaj aenmoh iq de, gou dawz mbaw cwngsuh haenx diemjdawz, feiz hoenzngeungeu, henz moh caem- rwgrwg, gou sim naekgywggywg, nanznanz mbouj gangj vah, nanznanz mbouj liz bae ……

Go vagut Siujmeiz mdaem youq gyanghongh gou haenx, aenvih mbouj miz byawz daeuj ganq, gou hix mbouj miz sim bae ganq, hix couh ngoenz ciemh ngoenz reuq, doeklaeng, va couh loenq liux lo. Yawj dwk go va neix, sim gou gig in. Yienghneix, miz ngoenz ndeu, gou couh senj de bae daengz gwnz ndoi, genj gizdieg daengngoenz ciengz ciuq daengz namh youh biz ndeu ndaem roengzbae.

Daj ngoenzde hwnj, ndaw gyanghongh gou mbouj caiq ndaem gova, gou cij muengh go vagut haenx youq gwnz ndoi maj ndaej engq ndei di, va hai ndaej engq gyaeundei engq nanz.