Bi’gvaq, Bingzgoj Yen comz rengz youq dieg saujsu minzcuz guh ndei hong fuzbinz haifat, daengx yienh hong fuzbinz ndaej fazcanj gig lai, gij diuzgen dieg saujsu minzcuz ndaej gaijndei gig lai.

It dwg gyalai roengzngaenz. Daengx yienh gungh bienguh hanghmoeg 247 aen, roengz 98.74 ik maenz, ndawde roengz 31.70 ik maenz guh gihcuj sezsih, roengz 15.84 ik maenz fazcanj canjyez, roengz 15.94 ik maenz fazcanj minzswngh, roengz 15.42 ik maenz fazcanj gunghgung fuzvu, roengz 1.24 ik maenz fazcanj naengzlig, roengz 18.60 ik maenz henhoh nem gaijndei swnghdai vanzging.

Ngeih dwg gyarengz bangfuz canjyez. Bangfuz fazcanj gosangh nonsei canjyez, gungh yinh daeuj、fatcuengq dinfaex gosangh 6260 fanh go, ndaem liux suen gosangh 1.3 fanh moux; lingh guh ndei hong cawx 280 dun feizliu, yinh 28000 dinfaex gosangh hawj Giucwngz Cin Luzyenz、Luzhungz song aen cunh ndaem. Bangfuz guh lajfaex ciengx gaeq hanghmoeg, gungh roengz 112.6 fanh maenz, bangcoengh 225 ranz gungzhoj fazcanj lajfaex ciengx gaeq.

Sam dwg nyinhcaen guh roen mbanj gaep. Cienzmienh guh sat hong 2012 nienz daihngeih buek youq dieg saujsu minzcuz guh gihcuj sezsih, guhbaenz roen mbanj gaep 10 diuz gungh 9.9 goengleix, gij hanghmoeg neix hawj fanh lai vunz diegbya souh’ik.

Seiq dwg cizgiz gawjbanh gohgi beizyin. Aen yienh neix gungh gawjbanh 11 geiz nungzminz saed- yungh gisuz beizyinbanh, doenghboux camgya beizyin de gungh miz 900 lai vunzbaez; gonqlaeng 3 baez cujciz doenghboux ganbu“song veij”mbanj gungzhoj de bae camgya yienh gaep、gih gaep“song veij”ganbu beizyin, hawj doenghboux daiq roen lai rox, demgya saenqsim daiq vunzlai duet hoj baenzfouq. (Lij Gyanghlanz)