Danhfanz naengnoh rog da dekleg, cehda mboujmiz sieng seiz, itdingh aeu haeujsim baujciz gizsieng seuqsak, gaej yungh fwngz uq roxnaeuz baengz uq bae goemq gizsieng, aeu gij doxgaiq seuq bausuek ndei le caenhvaiq soengq bae yihyen ra canghyw cawqleix ceihyw, mienxndaej ngoenzlaeng louz miz rizmbangq yakyawj.

Naengh cehda deng doxgaiq bungqdeng roxnaeuz ngad sieng seiz, ndaw da bouxsieng gojnwngz okyienh ndaemq、lau ndit、raemxda lae, naengh i gokda deng sieng lij rox okyienh insep dem. Mwhhaenx, danghnaeuz miz luzmeizsu yenjyozsuij, ndaej ndik di ndeu roengzbae yawhfuengz ganjyenj, doeklaeng caiq aeu baengzsa seuq roxnaeuz soujgaen goemq ndei lwgda le soengq bae yihyen cingj canghyw genjcaz ceihyw.

Naengh lwgda deng sieng seiz, miz doxgaiq cigciep coeg haeuj roxnaeuz reg gvaq cehda yinxbaenz cehda dekleg, couh sikhaek da myox caemhcaiq insep. Wng sikhaek hawj bouxsieng ninz roengz, ciengeiz gaej yungh raemx swiq roxnaeuz led yw, wng aeu baengzsa seuq hoemq gwnz lwgda caemhcaiq aeu saibaengz yaengyaeng bausuek, cienggeiz gaej yunghrengz daenzat. Bausuek muzdiz dwg hawj gizde mbouj deng ndit ciuq gig sienghaih lwgda. Sojmiz da sieng cungj aeu bausuek song lwgda, mienxndaej mbiengj da ndei hozdung daiqdoengh mbiengj da in baenqdoengh cix cauhbaenz nucat, bingh engq haeuj naek. Doeklaeng vaiq di soengq de bae yihyen ciengjgouq, mbouj ndaej nguh seizgan, couhcinj mbangjseiz ngamq miz mbiengj da ndeu dengsieng, baez nguh seizgan mbouj ndaej gibseiz ceihyw cawqleix seiz, mbiengj da ndei haenx hix rox deng yingjyangj cauhbaenz damengz.

Mbangjseiz lwgnyez fwngz gaem dawh roxnaeuz yenzbit buet mbouj siujsim deng laemx, dawh roxnaeuz yenzbit coeg haeuj da bae, cauhbaenz cehda dengsieng, cawjranz ciengeiz gaej gag yut ok. Hawj lwgnyez ninz roengz, youq mbiengj da sieng haenx hoemq di doxgaiq seuq ndeu le sikhaek soengq bae yihyen ciengjgouq. Youq gwnz roen, gaej hawj lwgnyez daejnauh, caenhliengh gemjsiuj saenqdaenh.