De haucau daengx gih gak gaep gihgvanh、swnghcanjdui、bingdoih、hagdangz、giyez caeuq danhvih saehnieb, sam bi ndawde, youq gij dieg ndaej ndaem faex baihhenz danhvih haenx ndaem doh faex bae, doengzseiz cienzbouh dauqndei gij diegriz raemjbag、diegriz feiz coemh haenx hwnjdaeuj, hawj gyoengqde dauqfuk yienghgaeuq. Cawz vunzgeq、lwgnyez、vunzbingh le, sojmiz gij ganbu、vunzhong、hagseng、bouxbing、vunzyouq singzcin, vunzvunz bibi cungj aeu camgya ndaem faex cauh ndoeng, caemhcaiq baujcingq ndaem ndaej lix. Guh baenz vunzvunz ndaem faex, vunzvunz gyaez faex, gaemhong daengzdaej.

Doengzbi ndwen 12, hai Gvangjsih Bouxcuengh Swcigih Daih Ngeih Gaiq Lwgminz Daibyauj Daihhoih Baez Hoih Daih It, Veiz Gozcingh daibyauj Swcigih Lwgminz Veijyenzvei guh hong cwngfuj baugau, de youh dangq ndaem faex cauh ndoeng dwg “gij cosih canloz gaenbonj gaijbienq diuzgienh swh- yienz Guengjsae haenx” daez okdaeuj, hawj hoihhung saemjyaeng le guh ok gietdingh, haucau daengx gih gak cuz yinzminz yungh “goengngawz senj bya” dingz cingsaenz neix, genhciz roengzrengz, ceng ndaej youq duenh seizgan mbouj daiq nanz haenx ndawde, guhbaenz aen yinvu loegvaq Guengjsae raeuz.

Daj neix hwnj, daj gwnz daengz laj daengx gih cungj hengzdoengh hwnjdaeuj lo, haemq vaiq daengx- cungq vunzlai cix guh ndaej hoenghhwdhwd.

Bi 1964 ndwen 1, Namzningz Si daj ngoenz 14 daengz ngoenz 19, 6 ngoenz cix okdoengh 8 fanh vunz, faenbied bae daengz gij henzroen Roen Yunghningz、Roen Youjyiz、Roen Sihyanghdangz haenx caeuq gij ndoifwz Ndoiduzfungh、Ndoisienseng haenx vat gumz ndaem faex. Gveilinz、 Liujcouh、Vuzcouh caeuq gij digih、si、yienh, caemh okyienh gvaq gij hozdung vunzlai gag ndaem faex cauh ndoeng haenx.

Gvaqlaeng, bibi seizcin, youz goengdaeuz guhdaeuz bae ndaem faex cauh ndoeng baenz le hangh cidu ndeu.

(caengz sat)