（ciep geiz gonq）

“Yienghneix gou mbouj bae lo, ce sam cien lai maenz gvaqlaeng yungh lij ndei gvaq.” Buzsam naeuz.

Bae roxnaeuz mbouj bae cungj nanz, mbouj bae, vunzmbanj gaenq rox liux lo, bae le, lwglan youh deng sai baenzlai ngaenz. Buzsam sim luenhsaebsaeb.

Raen Buzsam dungxmboek, nangzbawx couh riu dwk nai de naeuz: “Daxmeh, mbouj yungh you, cienz neix dou ok ndaej, caiq gangj seizneix fanh maenz ngaenz gaenq mbouj suenq hung lai lo, mwngz couh onjsim bae youz ba !”

“……”

“Dwg ha, daxbuz, miz haujlai vunz ndangdaej mbouj ndei, miz ngaenz cungj bae mbouj ndaej bw.” Daeglan hix got Buzsam naeuz.

Lwglan gangj ndei gangj rwix, Buzsam sim’in vanz sim’in, lij doengzeiq bae youz lo.

Youz aen singhgiz ndeu, cawz liux naengh ci, couhdwg ganj seizgan byaij loh, youz gizneix lij caengz yawj gaeuq, youh ganj bae youz gizwnq lo, gaenjgip dangqmaz, Buzsam rox sinhoj lai, caeux couh maqmuengh vaiq di dauqma lo.

Dauqdaej dauq daengz ranz lan lo, Buzsam faencung ndeu hix mbouj siengj caj, seizneix cij roxnyinh ranzlaux lajmbanj ceiq ndeiyouq、ceiq cwxcaih.

Buzsam baez dauq daengz ranz, couh dawz gijgwn gij doxgaiq youq Baekging cawx ma haenx fat hawj gyoengq baengzyoux de, gyoengq baengzyoux de daegbied maij haiz- baengz baiz “laux Baekging” haenx, gyoengqde riuhaha, lij dawz haizbaengz daenj haeuj din bae cim bae cim dauq dem，ndaw ranz Buzsam lumj gwnzhaw nei nauhyied dangqmaz.

Ngoenz daihngeih, gyoengq mehlaux youh comz youq laj gofaex- rungz laux gangjgoj lo.

“Buzsam, baezneix bae Baekging ndaej raen gijmaz、 gwn gijmaz lai, lwnh dou nyi vei, hawj dou swiqswiq rwz cungj ndei ha?” Mehngux baklai, bingzseiz maij ra vah gangjriu.

Buzsam mizyinx dwk gangj hwnjdaeuj: “Ndei youz dwg ndei youz, hoeng bouxvunz ndang ndeindi’ndi ndeu bae youz dauqma couh lumj fatbingh naek nei hojsouh, dan naengh ci hix gaeuq sinhoj lo, gou ngunh ci, rueg daengz dungxsaej yaek fan bae!”

“Gangj daengz naengh feihgih, raemx、mid hung mid iq cungj mbouj ndaej daiq hwnj feihgih, boux vunz ndeu ndaej daiq geijlai gaen doxgaiq cungj miz gvidingh, seizhaenx gou ngeizvaeg dangqmaz, hix sim’in dahraix, haujlai doxgaiq cungj ngaiz ‘gyau’ liux bae, doeklaeng cij rox, gij doxgaiq lai haenx laxlawz dwg cuengq youq lingh aen cang hane, roengz feihgih le vunz hawj dauq raeuz.”

“Daengz Baekging le, dou geij cib boux vunz cungj ngaiz “gai” hawj lijyouzdonz liux bae, boux daujyouz bae gizlawz, raeuz couh deng gaen bae gizhaenx. Daeglan naeuz gou nyi: Dou geij cib boux vunz caen dwg ngaiz ‘gai’ hawj lijyouzdonz liux lo. Gou caen lau dou mbouj ndaej cuengq dauqranz ne, daengz gyoengq boux- daujyouz soengq dou hwnj ci dauqranz le gou cij cuengqsim.”

“Gangj daengz gij gwndaenj, vunz ndawsingz Baekging yienznaeuz gig miz cienz, hoeng mbaetgwn lai, donq neix gwn mienh, donq haenx gwn gaugyaeq, cungj sij mbouj ndaej ceuj byaek gwn. Gyoengq vunz ndawsingz daenj buhvaq cungj mbouj baenz yawj, gyoengq lwgsau daenj buh dinj ndaej cij cw daengz buenq aenndang, aen saejndw vang raeh cungj raen liux, mbouj rox gyoengqde dwg mbouj dwg launyaenq.”

“Gangj daengz gij gaicawx engq ndeiriu lo, aen laeuz geij cib caengz, ndawde boux bae boux dauq doenghyubyub, hoeng cungj mbouj raen miz dou haeuj ok, lumj mbouj siengj guh seng’eiq nei.”

“Byaij haeuj ndaw laeuz, baihndaw gig hung, gij haiz、gij buh、 gij gwn……yienghyiengh cungj dwg baenz caengz baenz caengz baij, byaij gvaengz ndaw couh mbouj rox baihdoeng baihsae, mbouj rox bakdou youq baih lawz lo, mbouj lumj dieg raeuz, gwnzhaw huq rim gai venj youq baihrog, siengj cawx gijmaz, youq giz gyae’gyang couh yawj ndaej dawz.”

“Gangj gij dieg ceiq ndei youz, youq Baekging ceiq yinxdaeuz dwg Gugungh caeuq Cangzcwngz lo……”

Buzsam lwnh ndaej roenx- foedfoed, gyoengq vunz dingq ndaej maezmyiegmyieg, rumzliengz cifefe, gyoengq mehlaux daxbuz lumj caenndang bae youz Baekging nei, bouxboux gamjdaengz gig vaiqvued.

(sat)