Bi’gvaq, Nazboh Yen daj goek daengz byai dawz hengzguh gak hangh minzcuz youhvei cwngcwz dangguh hong cungdenj, cizgiz ceng’aeu gij cienzngaenz、 hangh- moeg guh minzcuz fuzbinz de, haenqrengz guh ndei hong minzcuz, coi minzcuz ginghci nem gak hangh sevei saehnieb cienzmienh fazcanj.

It dwg guh ndei senhconz fatdoengh. Yungh banjbau、fukvang、bauqciengz、vangjloz、densi daengj lai cungj bingzdaiz, senhconz moix hangh minzcuz youhvei cwngcwz, hawj bouxboux rox gij cwngcwz neix. Ngeih dwg guh ndei anbaiz. Ciuq gij iugouz moix hangh minzcuz youhvei cwngcwz, giethab daengx yienh gunghcoz, dingh ok mizgven gungh- coz fangh’an, yienghyiengh cungj ciuq cwngcwz、baiz gonqlaeng、ciuq mbaekyamq gonqlaeng bae banhsaeh, cug caengz guh ndei. Sam dwg guh ndei hanghmoeg guenjleix. Sojmiz gij hanghmoeg moq、gyaguh、gaijguh de yaek saemj hab mbouj hab vanzbauj gvidingh gonq, mbouj hawj gij hanghmoeg mbouj hab guekgya canjyez cwngcwz de laebhwnj, doiq gak loih hanghmoeg moq daj goek daengz byai guenj caez bae. Seiq dwg guh ndei hong faen yinvu. Ciuq gak dieg cingzgvang, dawz minzcuz fuzbinz gensez yinvu faen daengz gak yanghcin, caemhcaiq iugouz gak yanghcin caeuq ndaw yienh mizgven bumwnz guh ndei doxciep, guh ndei dajsuenq, nyinhcaen comz rengz hengzguh. Haj dwg guh ndei hong coiguh cazyawj. Yienh giveij ok vwnzgen caemhcaiq caeuq cwngfujban duhcazsiz、minzcuzgiz、fuzbinzban、suijligiz、fazgaijgiz daengj bumwnz cujciz duhcazcuj, coi nem cazyawj gij cingzgvang ndaw yienh minzcuzgiz、fuzbinzban、suijligiz、fazgaijgiz、gyauyuzgiz、vwnzdijgiz、nungzyezgiz、linzyezgiz、giswnghgiz daengj bumwnz caeuq yanghcin hengzguh gak hangh minzcuz youhvei cwngcwz.

Daj bi’gvaq daeuj, daengx yienh gak nungzyez mizgven bumwnz gaenq ciuqseiz fat gij cienzngaenz boujdiep ndaemhaeux、cawx nungzgih、ndoeng swnghdai、dihbauj、bang vunzmbanj henzguek、cawx liengzcungj daengj 8900 fanh maenz, 22700 lai nungzhoh souh’ik.

(Vangz Bizvaz)