Vei, daihgya ndei! Gou gaenq con gvaq seizneix, naengh aen gihseizgan daeuj daengz aen seiqgyaiq daengzcog. Gizneix dauq- cawq dwg gauhgohgi, bouxboux cungj siengj guh gijmaz couh guh gijmaz, dauqcawq miz gij hoengheiq seuqsien haenx, couh lumj dwg youq henz ndoeng faexmwn haenx ityiengh. Mwngz gaej mbouj saenq, gou daiq mwngz bae yawjyawj.

Bae dieg guhhong gou yawj gonq! Gou gaenq dwg boux gungh- cwngzswh ndeu, cijaeu gamyawj “gunghyinz”——vunzgihgi guhhong caeuq sezgi dozceij, bi ndaej cienz 1000000 fanh. Mwngz gaej yawjsiuj gou, lajfwngz gou miz baenz haj cien “gunghyinz” ne, lijmiz song boux gunghcoz yinzyenz, gou cij aeu naeuz hawj gunghcoz yinzyenz sing ndeu, gyoengqde couh naengz cijveih hawj vunzgihgi guhhong, vunzgihgi rengz hung dangqmaz, mbouj rox baegnaiq, gizlawz cungj bae ndaej, gijmaz yungyiemj cungj mbouj lau, laemx sieng le, in le, cij yungh vuenh di lingzgen, caen dwg boux bangfwngz ndeiraeuh vunzraeuz. Gunghcoz yinz- yenz hix mbouj yungh sinhoj bae gamyawj, cijaeu youq ndaw ranz dajhai gisongih, youq gwnz gisongih roengz lingh couh ndaej, sat le guh gij saeh swhgeij siengj guh haenx, dwk youzhi、 youz gai、 gangjgoj, guh gijmaz cungj ndaej, hwnjban caeuq yietbaeg ityiengh cwxcaih. Mboujdan dwg giz gou yienghneix, daengx aen seiqgyaiq cungj dwg yienghneix, caezgya cungj gig cwxcaih.

Aen ranz gou engq daegbied, aen neix dwg gou gak sezgi. De lumj song go faexhung, cibfaen cocangq, diuz roen doeng ranz guh lumj gij gaeu ndaw ndoeng nei. Ndaw ranz miz gij mbawheu, ndaej vaqgej uqlah, guh gvanghhoz cozyung, hawj ndaw ranz seizseiz miz yangjgi, doengzseiz, aenranz lij miz aen camj he, aen camj baez goeb, aen ranz couh rox yaem bae, siengj yaem aen ranz bae rox naeuz hawj vunz yawjraen, cungj youzcaih gou maij. Ndaw ranz gou gwnz namh hai rim va, maj rim nywj, lij miz geij go faexhung dem, gwnz faex miz gak cungj gak yiengh doenghduz youq, gou moix ngoenz caeuq gyoengqde guh baengzyoux. Aen ranz gou cijmiz gou caeuq bohmeh gou ndaej haeujbae, aende rox gag yiemzgek genjniemh gij sing caeuq gij lwed boux yaek haeuj ranz, caen dwg vunz ndaw ranz cij ndaej haeujbae, danghnaeuz vunzrog nyengz roemx haeujbae, couh rox deng dienh bag ngunh, seizneix aen baugingjgi gwnz dingjranz rox gag bauq hawj gou, lij ingj dozbenq conz hawj gou yawj, yaek gaeb yaek cuengq bouxhaenx youzcaih gou. Ndigah, ndawbiengz cungj mbouj miz bouxcaeg lo, gingjcaz hix mbouj miz hong guh lo, gyoengqde cungj bae dwk youzhi, dangyienz, ngaenzgoeng ciuqyiengh lingx law.

Mwngz yawj, dou ok rog cungj naengh feihhingzgi. Gij yiengh feihhingzgi cien loh fanh yiengh, gijmaz cungj miz. Aen gou couh gig geiz: Miz caengz byukbaujhoh he, ndaej gek gij hoengheiq uq, aen gyaeuj luenzlulu haenx, couh dwg yungh daeuj comz daiyangznwngz. Vunzraeuz mbouj caiq vih naengz- yenz vwndiz uk in lo. Gou naengh haeuj ndaw bae, siengj bae gyawz, cij yungh naeuz dieg hawj de, de couh rox gag mbin bae gizhaenx, gijmaz doxgaiq de cungj ndonj ndaej gvaqbae, hoeng youh mbouj dwk vaih gij doxgaiq haenx, de miz seiq gaep naengzliengh, con gvaq fuk ciengz cungj gig heih. Gou lij ndaej naengh de bae ronghndwen, de mbouj hawj vunz naengh dauqdingq, hawj vunz lumj dwg youq gwnz namh byaij ityiengh.

Gou lij youq daej haij guh le aen singz he, aen singz neix youq ndaej baenz cibgeij fanh vunz, duz byasahyiz bang dou swnzloz, vunzraeuz moix ngoenz youq daej haij ndaej yawj gij doenghduz ndaw haij youq gwnz gyaeuj youz bae youz dauq, gyaeundei yaek dai!

Aen seiqgyaiq daengzcog geiz- miuh baz! Mwngz hix ganjvaiq naengh aen gihseizgan, daeuj aen seiqgyaiq dou ba, gou angqcoux sou!

(roek nienzgaep Vangz Vei)