Lumjnaeuz, mwh veh dieg cauh ndoeng haenx, aeu louz gij dieglanghvaizyiengz roengzdaeuj, fanzdwg gij dieg ndaem faex cauh ndoeng haenx, mboujcinj bae langh doihduz. Gij dieg gyawj mbanj, aeu ndaem ndoengfwnz, yienghneix daeuj gaijgez gij vwndiz vunzmbanj yungh fwnz. Youq gyawz ndaej raemj fwnz, gijmaz gofaex ndaej raemj, aeu ciuq cingzgvang bonjdieg ceiqdingh banh- fap, guh ok gvidingh gidij daeuj. Aeu senhconz 《Gij Diuzlaeh Baujhoh Ndoengfaex》gozvuyen fatbouh haenx, hawj baujhoh ndoengfaex cauh baenz fungheiq, hingzbaenz cidu. Aeu baengh vunzlai caez daeuj baujhoh ndoengfaex, caeuq gij saeh buqvaih ndoengfaex haenx doxdingj, doiq gij vunz coemh ndoeng haenx, itdingh aeu eifap cingzfad, doiq gij vunz hwnjheiq hoh ndoeng re feiz haenx, itdingh aeu dajciengj biujyiengz.

De giengzdiuh, cauh ndoeng aeu gvancez “daj gyawj daengz gyae、daj ndaw daengz rog”, “ndaem faex cauh ndoeng caeuq fung bya hoh faex doengzcaez guh, guekguh cauh ndoeng caeuq yinzminz gunghse、swnghcanj- dui cizdij cauh ndoeng、seyenz gag lingzsing ndaem faex doengzcaez guh, cauh ndoeng caeuq guenjhoh doengzcaez yawjnaek” gij fuengcim swcigih dangjveij daezok haenx. Gij byafwz hab ndaem faex haenx lai, dieghenz singzcin caemh miz haujlai byafwz. Wnggai youq gij dieghenz Namzningz、Liujcouh、Gveilinz、Vuzcouh seiq aen si neix, youq gij dieghenz yinzminz gunghse、swnghcanjdui, youq dieghenz nungzcangz, youq song henz dietloh、goengloh、dah caeuq dieghenz suijgu ndaem faex cauh ndoeng gonq, cugbouh ietraez coh baihrog. Aeu ciuq gij diuzgienh dieghingz, baenz benq baenz gaiq lienz benq ndaem. Aeu ciuq cingzgvang bonjdieg bae okmaeuz, genj gij gofaex ndei hab diuzgienh bonjdieg haenx daeuj ndaem. Mboujdanh yaek cauh ndoeng’aengingj、ndoengyunghcaiz, lij yaek cauh cazyouz、youzcoengh、mak caeuq haeuxgwn moegbonj daengj ndoengfaexgai, song haenz dah yaek ndaem lai di gocuk. Giethab gyoengq vunzlai ndaem faex caeuq doihciennieb guenjleix hwnjdaeuj. Bimoq、bilaeng mboujdanh aeu guh banh ndei suen’golwg guekguh, lij aeu fatdoengh yinzminz gunghse caeuq swnghcanjdui banh ndei suen’golwg cizdij, yienghneix cij ndaej hab gij aeu daih gveihmoz bae cauh ndoeng haenx.

(caengz sat)