“Buzsam, vaiq di daeuj vei, mboujne, couh mbouj miz dieg naengh lo.”Gyoengq doengzdoih youq laj gofaexrungz hemq dwk.

“O, daeuj couh daeuj.” Buzsam riuhaha yamq vaiq byaij gvaqdaeuj.

Buzsam bineix caetcib lai bi, gvan de gaenq gvaqseiq lai bi, de bouxdog gvaq saedceij, de ndangdaej ndei, vunz unqswnh, bingzciengz mbouj nyaengq lai couh maij gangjgoj, baez bungzdaengz boux gangj ndaej ngamj, mbouj gwn mbouj ninz hix dingj ndaej.

Buzsam ciengx miz sam daeg lwg, song dah sau, gyoengqlwg cungj hauqgingq de. Daj lwglan majhung mbouj yungh de daiq le, Buzsam couh dauq lajmbanj ranzlaux gag youq. De youq lajmbanj ndaem byaek ciengx gaeq, binaengz gyoengqlwg dauqma gvaq ciet, ndaej gwn gaeqdoj byaek singjsien, Buzsam angq youq ndawsim.

Buzsam rox gij saedceij gag youq neix gig cwxcaih: Gwn bingj gwn mak gag cawx, gwn diemz gwn soemj youzcaih raeuz. Cungj saedceij neix gyoengq daxbuz lajmbanj hozhaenz raixcaix, mwh caeuq gyoengq mehbuz ndaw mbanj youq laj gorungz gangjgoj, gyoengq vunzmbanj cungj naeuz Buzsam miz fukheiq, Buzsam roxnyinh naj ronghsagsag.

Ndwen gonq gvaq ciet, gyoengq lwglan dauqma gwnngaiz, lij cawx aen densi moq ndeu hawj Buzsam, ndaw ranz de engq nauhyied lo.

Gaxgonq lwglan doegsaw aeu yungh cienz, gyoengq lwg naeuz cawx densi hawj song bouxlaux, Buzsam cungj mbouj haengj:“Song dou cih saw mbouj rox, rwz youh laengq, sai cienz neix guhmaz, louz ngaenz hawj gyoengq lan doegsaw ba !”

Seizneix gvan de baesien le, lwg de raen de mbwq lai, couh cawx densi hawj de gaijmbwq, Buzsam angqvauvau.

Doenghbaez, Buzsam cungj dwg mbiengj gwn ngaiz, mbiengj yawj densi, mwhhaenx cingq dwg “Sinhvwnz Lenzbo”, raen gij guekgya lingjdauj haihoih, de couh naeuz:“W, baenzhaemh hix caengz ndaej gwn caeuz dem, dungx iekngaungau lo, guhhak sinhoj lai.” Buzsam gangj sat, nyex ndaej gyoengqvunz cungj riu liux bae.

Gyoengq lwg Buzsam ndawde daeg lwgiq ceiq in daxmeh, daegiq naemj, youq daxmeh ndangdaej lij ndei daiq de bae Baekging youz baez ndeu. Dingjlingz mbouj geij nanz, danhvei daegiq cujciz vunz bae Baekging youz, de gietdingh daiq daxmeh bae.

Ngoenzhaenx, daeglan dwk dienhvah daeuj:“Daxbuz, gou gaenq cuengqgyaj dauqranz lo, gvaq geij ngoenz danhvei daxboh gou bae Baekging youz, dou siengj daiq mwngz caez bae dem, mwngz bae lwi? ”

“Ha, bae Baekging? Gou baenz laux lo, vunz hawj bae lwi?” Buzsam angqvauvau, sim diuqbubbub.

“Ndaej, cijaeu mwngz siengj bae, dou couh daiq mwngz bae. ”

“W, bae couh bae, seiqvunz ndaej bae Baekging baez he, dai hix da laep lo!”

Hw, baezneix youq baihnaj gyoengq doengzdoih youh miznaj lai lo,Buzsam gag naemj, naj riu lumj dujva.

Haet daihngeih, Buzsam angqvauvau vaiqvit gwn geij gaemz ngaiz le, couh daeuj daengz laj gorungz naengh caj doengzdoih daeuj gangjgoj.

Haetcaeux, gyoengqvunz guh- hong baedauq cungj gvaq laj gorungz, byawz cungj cam Buzsam: “Buzsam haet neix ndaejhoengq baenzcaeux ha? Mbouj bae ganq suenbyaek?”

Byawz cungj mbouj rox, Buzsam dwg siengj dawz aen siusik ndaej bae Baekging lwnh hawj daihgya rox, sawj gyoengqde hozhaenz baez he.

Buzsam naengh le haujlai nanz, cij raen geij boux mehbuz umj lan okdaeuj liuh. Buzsam riunyumnyum caeuq vunz gangjgoj hwnjdaeuj.

Gyoengqvunz rox daengz Buzsam yaek bae Baekging youz, bouxboux cungj hozhaenz de mingh ndei, Buzsam angq dwk riu ndaej bak haep mbouj ndaej bae.

Buzsam cingsaenz gvaekgvaek naengh ci bae comz lwglan, yaek bae Baekging youz lo.

“Ha? Aeu gyau baenzlai ngaenz cij ndaej bae ha?” Buzsam bae daengz ranz lan rox gyau sam cien lai maenz,doeksaet liux!

“Dwg bw, boux sam cien lai maenz, raeuz seiq boux vunz, couh aeu fanh lai maenz cij ndaej bw!” Nangzbawx daegiq riu dwk han naeuz.

“Gij cienz neix gaeuq gou gwn daengz dai cungj gwn mbouj liux bw!” Buzsam sim’in dwk naeuz.