Bonjbauq siusik(gicej Dangz Lungz) Bi’gvaq 12 nyied 30 hauh banhaet, Gvangjsih Bouxcuengh Swcigih Daihcaet Baez Minzcuz Doxgiet Cinbu Byaujcangh Daihhoih youq Nanzningz hai. Swcigih Dangjveij suhgi、Swcigih Yinzda Cangzveijvei cujyin Bungz Cinghvaz camgya haihoih caemhcaiq gangjvah. Swcigih Yinzminz Cwngfuj cujsiz Cinz Vuj cujciz baez hoih neix. Swcigih cwnghez cujsiz Cinz Civaj camgya. Swcigih Dangjveij fusuhgi Veih Cauzanh doeg aen gietdingh Swcigih Dangjveij、Swcigih Yinzminz Cwngfuj byaujcangh minzcuz doxgiet cinbu mozfan de.

Bungz Cinghvaz daibyauj Swcigih Dangjveij、Cwngfuj angqhoh doenghgij cizdij nem bouxvunz ndaej bingzguh minzcuz doxgiet cinbu mozfan de, gingq doenghboux okrengz guh saeh hawj gih raeuz minzcuz doxgiet cinbu.

Bungz Cinghvaz naeuz, daj daihroek baez minzcuz doxgiet cinbu byaujcangh daihhoih daeuj, gih raeuz gaemmaenh aen cawjdaez gak minzcuz doengzcaez doxgiet haenq- rengz、doengzcaez hoenghhwd fazcanj, roengzrengz doihaeuj minzcuz doxgiet cinbu saehnieb, minzcuz doxgiet cinbu engqgya haeujlaeg, gij yienghsiengq dieg minzcuz gaijndei gig lai, minzcuz doxgiet sevei gihcuj engqgya maenh, minzcuz gunghcoz gihci engqgya hableix.

Bungz Cinghvaz giengzdiuh, itdingh genhciz minzcuz gihyiz swci cidu, cienzmienh gvancez lozsiz minzcuz cwngcwz dangj raeuz; itdingh genhciz fazcanj daih’it, gyavaiq dieg minzcuz fazcanj, roengzrengz gaijndei minzswngh, caenh’itbouh laebmaenh minzcuz doxgiet cinbu vuzciz gihcuj; itdingh haeujlaeg gaihcanj minzcuz doxgiet cinbu gyauyuz, cauh aen fwnveiz ndei gak minzcuz doxgiet fazcanj; itdingh haenqrengz beizyangj nem senj yungh saujsu minzcuz ganbu; itdingh caezcienz gij gohyoz gihci hezdiuz minzcuz gvenhaeh, genhciz doiq saeh banh saeh, cawqleix ndei gij saeh minzcuz doxceng, coicaenh gak minzcuz doxgiet huzndei.

Bungz Cinghvaz iugouz, it dwg cungfaen roxyiuj seizneix guh ndei hong minzcuz gig youqgaenj, lai rox cwzyin naek nem lai rox saeh aeu haenqguh. Ngeih dwg daihlig doihaeuj minzcuz doxgiet cinbu mozfangih gensez, laebmaenh nem fazcanj cungj seveicujyi minzcuz gvenhaeh doengzbingz doxgiet doxcoengh huzndei neix, itsim gvancez lozsiz minzcuz cwngcwz dangj raeuz, genhciz nem caezcienz minzcuz gihyiz swci cidu; itsim gyavaiq dieg minzcuz fazcanj; itsim henhoh minzcuz doxgiet huzndei cungj minzcuz gvenhaeh neix. Sam dwg gyagiengz lingjdauj hong minzcuz, vih minzcuz doxgiet cinbu saehnieb daezhawj baujcang giengz ak.

Gih raeuz dangj cwng ginh bouxfucwz wnq, gak si bouxfucwz, bouxfucwz gih cizsuz danhvei、cunghyangh cizsuz danhvei fudingh- giz doxhwnj youq gih raeuz, doenghboux daibyauj cizdij nem bouxvunz ndaej byaujcangh guh mozfan de, caeuq gak cuz gak gyaiq ginzcung daibyauj 600 lai vunz camgya baez hoih neix. Baez hoih neix doenggvaq densi sibinz veiyi ciuhai, gak si、yienh(gih) doenghboux lingjdauj ganbu youq dangdieg veicangz camgya haihoih.

Gungh miz 200 aen cizdij nem 300 boux youq swcigih minzcuz doxgiet cinbu saehnieb ndawde okrengz gig lai aeu ndaej cingscik maenhndei haenx ndaej byauj cangh.