Lwgmaenz ndaej yw lai cungj bingh, ndaw lwgmaenz hamz miz veizswnghsu C caeuq veizswnghsu E mbouj yungzheih deng buqvaih, doengzseiz, veizswnghsu E ndaej hawj vunz doiceiz nyieglaux, veizswnghsu C ndaej hawj ndang vunz dingj ndaej dwgliengz daengj lai cungj binghdoeg. Ceiq cujyau yenzyinh dwg de naengz dingj ndaej aizcwng.

Doengzseiz, ndaw lwgmaenz hamz gyaz lai, ndaej fuengz vunz baenz hezyaz sang, caemh ndaej yawhfuengz baenz mauhfung. Gij ienghau ndaw lwgmaenz ndaej hawj vunz doeng haex、vued lwed、hanhaed ndangnoh gaenjcieng hoetsuk. Dawz lwgmaenz daem yungz nap aeu raemx de led gizsieng, ndaej yw sizcimj caeuq duzsip haeb sieng.

Yienghneix, gwn lwgmaenz aeu haeujsim gijmaz ne?

It、Seizlawz baenz gwn. Ndaw lwgmaenz hamz danbwzciz caeuq lauz gig siuj, ndigah aeu caeuq byaekheu、lwgmak nem gijgwn hamz danbwzciz lai haenx itheij gwn cij mbouj sied yingzyangj. Ceiq youqgaenj dwg, lwgmaenz ceiq ndei dwg banngaiz gwn. Neix dwg aenvih, vunzraeuz gwn lwgmaenz le aenndang bouxvunz aeu ginggvaq 4 daengz 5 diemj cung cij ndaej supsou gai ndaw maenz, banringz ndit ciuq cingqngamj ndaej coi aenndang supsou gai. Youq cungj cingzgvang neix lajde, banngaiz gwn lwgmaenz, gai doxgaiq ndaej youq donqcaeuz gaxgonq supsou liux, mbouj yingjyangj daengz donqcaeuz supsou gij gai ndaw gijgwn wnq.

Ngeih、Lwgmaenz geih caeuq lwgndae doengzcaez gwn. Ciuq Cunghgoz Yingzyangj Hezvei conh- gyah gaisau naeuz, lwgmaenz caeuq lwgndae mbouj hab doengzseiz gwn, siengj gwn cix ceiq siuj doxgek 5 diemj cung doxhwnj cij ndaej gwn. Danghnaeuz doengzseiz gwn, gij dangz ndaw lwgmaenz youq ndaw dungx fat oep le, rox hawj veisonh iemqok demlai, caeuq gij youzsonh nem gojgyauh ndaw lwgndae hwnj fanjying fatseng yaemz youq giet ndaek, youqgaenj seiz rox hawj dungxsaej ok lwed roxnaeuz baenz dungx biux naeuh. Danghnaeuz gamjdaengz dungx mbouj cwxcaih, itdingh aeu bae yihyen guh veiging genjcaz yawj dwg mbouj dwg dungxsaej ok lwed roxnaeuz dungx biux naeuh lo.