Vihliux guh ndei hong sonhag Cuengh Gun song saw vah, guh ndei hong baujhoh caeuq cienzswnj vwnzva Bouxcuengh, dawz hong minzcuz gyauyuz coq haeuj hagdangz gyauyuz, sawj hong minzcuz gyauyuz guh haeujlaeg. 11 nyied 29 hauh daengz 12 nyied 4 hauh, Gih Gyauyuzdingh youq Gvangjsih Minzcuz Dayoz banh Daengx Gih Cuengh Gun Song Saw Vah Gyauyuz Yen(Si、Gih) Gyauyuz Gizcangj Beizyinbanh. Aen beiz- yinbanh neix, gveihmoz hung, daengjgaep sang, cingj le boux lauxhangz、yozcej ndaw gih rog gih daeuj hwnjdangz, 35 boux yozyenz cungj dwg gyauyuz gizcangj roxnaeuz fugizcangj daj 35 aen yen(si、gih) daeuj.

Youq gwnz ban beizyinbanh, Gih Gyauyuzdingh Minzgyaucu Veiz Lanzmingz cucangj guh le《Cuengh Gun Song Saw Vah Gyauyuz Mozsi》conhdiz gangj goq, de cungjgez le seiq cungj gihbwnj mozsi Cuengh Gun song saw vah, vixok gij ndeicawq caeuq lij miz vwndiz haenx, vixok gaijgez vwndiz fuengfap, hawj hong Cuengh Gun song saw vah gyauyuz gih raeuz vix aen fuengyiengq ndeu. Sinhgyangh Gyauyuzdingh boux lauxhangz Dai Siengz gangj goq daezmoeg dwg《Gij Sizcenj Sinhgyangh Gyauyuz》, de daj bet aen fuengmienh gangj gij guhfap caeuq gij ginghyen Sinhgyangh Vah Saujsu Minzcuz caeuq Vahgun song saw vah sonhag haenx, cigndaej gih raeuz hagsib. Cunghyangh Minzcuz Dayoz gyausou Dwngz Singh gangj goq daezmoeg dwg《Lijsiengj Caeuq Yensiz Doxcung——Gij Gyauyuz Cuengh Gun Song Saw Vah Gvangjsih Youq Ndaw Lai Yiengh Saw Caemhyouq Cungguek Minzcuz Haenx》, de dauqngeix gij hong fazcanj song saw vah saujsu minzcuz gyauyuz Cungguek raeuz, faensik gij gunnanz seizneix hong song saw vah gyauyuz haenx, vixok diuz lohnaemj fazcanj hong minz Gun song saw vah gyauyuz, couhdwg aeu “aen genhciz ndeu” “song aen fanjdui” “lai yiengh mozsi caemhyouq”. Gvangjsih Dangjyau Lij Boh、 Gvangjsih Minzcuz Yisuz Yenzgiuyen Liu Mingzginh、Gvangjsih Sevei Gohyozyen Banh Gizyuz daengj boux lauxhangz baenbied guh le gij go daezmoeg dwg《Daezswng Lingjdauj Naengzliz Caeuq Lingjdauj Yisuz》、《Vwnzva Minzcuz Caeuq Vwnzva Hagdangz Gensez》、《Gejdoeg Gij Daegdiemj Vwnzva Bouxcuengh》. Ngoenz 3 hauh, gyoengq yozyenz bae Ginhcouh Si Nazmungz Cunghyoz gaujcaz hong Cuengh Gun song saw vah sonhag.

Baez beizyin neix, neiyungz lai, cijdaujsing mizrengz, gyoengq yozyenz bouxboux cungj anqvauvau naeuz hag ndaej gig lai, lij naeuz baema le gibseiz conzdaz hawj gij Cuengh Gun Sawqniemh hagdangz haenx, ganjvaiq roengzfwngz, dawz hong minzcuz gyauyuz guh ndei.