12 nyied 7 hauh, Vahcuengh Sawcuengh suijbingz gaujsi gauj sat le, Nanzningz gaujdenj miz song boux gaujseng yinxdaeuj haujlai boux gicej daeuj caijfangj, song boux de dwg boux gaujseng nienzgeij ceiq geq Nungz Gvangh caeuq boux nienzgeij ceiq oiq Mungz Fungcanz. Nungz Gvangh bineix 76 bi, dwg boux daihhag lauxsae duiyouh ndeu, de gig gyaez Sawcuengh, de naeuz, de daeuj camgya gaujsi, it dwg de gyaez Sawcuengh lailai, ngeih dwg siengj yawj Sawcuengh suijbingz swhgeij baenzlawz yiengh. Mungz Fungcanz 16 bi, dwg boux hagseng lij doeg cunghconh ndeu, de naeuz, de dwg lwg Bouxcuengh, ndigah gyaez Swcuengh, baezneix dwg gauj cogaep, gvaqlaeng itdingh roengzrengz gauj ndaej gaugaep bae.