Veiz Gozcingh gig doengzeiq boux dungzci laux nei. Ndoengfaex dwg goekraemx, miz ndoeng cij miz raemx, de lij iq cix gamjsouh gvaq. Mbanjranz de Doenglanz, gwnz bya laj bya cungj dwg gofaex mwncupcup, ndaw lueg raemx laesetset baenzbi, mboujlwnh mbwn rengx baenz yienghlaw, raemx coengzlaiz mbouj mbaet gvaq. Baihlaeng aenmbanj miz aencongh lai hung gvaq aenbatnaj ndeu, gizneix raemxmboq sawdikdik baenzbi, seiznyez de gig maij caeuq doengzdoih youq gizneix caemz raemx. Gvaqlaeng aenvih luenh ramj luenh bag, ramj faex cauh dieg, ndoengfaex noix le, raemx goj noix le.

Bineix mbwnrengx haenq caemh gangjmingz, youq gij diuzgienh doengzdaengj lajde, gij lienghfwndoek caeuq gij mienhhoemq ndoengfaex dwg baenz cingqbeij. Ciuq bumwnz heiqsiengq 1 daengz 9 nyied gyonj- geiq, Denzdungh、Denzyangz、Cungzcoj、Vujmingz、Liujgyangh、Laizbinh、Yilinz、Cinzhih daengj 8 aen yienh ndoengfaex haemq noix haenx, lienghfwndoek bingzyaenz cijmiz 400 lai hauzmaex; Yungzsuij、Sanhgyangh、Lungzswng、Swhyenz、Yungjfuz、Cauhbingz、Yungzyen、Lingzyinz daengj 8 aen yienh ndoengfaex haemq lai haenx, lienghfwndoek bingzyaenz ndaej 1000 hauzmij hwnjroengz.

Veiz Gozcingh caeuq gij goengdaeuz dangjveij、cwngfuj ndaw gih cungj nyinhnaeuz Guengjsae siengj daj gaenbonj bae gaijcawz gij haih cairengx caeuq cairaemxrongz nei, gvaqlaeng itdingh youq daihlig hwnjguh suijli doengzseiz, genhciz ca ndei gij hong cauh ndoeng loegvaq haenx.

Veiz Gozcingh youq baez hoih gwnzde naeuz: “Vunz ciengzciengz cij raen cauh ndoeng seizgan nanz、soundaej menh baihneix, mbouj raen doiq daengx aen gozminz ginghci caeuq vanzging mbwndeih miz gij cozyung gyaeraez. Cungguek miz coenz vahsug dwg ‘bya heu raemx saw’, ‘bya ndoq raemx yak’. Miz bya heu le cij miz raemx saw, bya ndoq bietdingh cauh baenz raemx yak, gijneix dwg gohyoz gyonjgyoeb okdaeuj. Cauh ndoeng loegvaq dwg hangh hongsaeh ndaej leih lai, youh cauhfuk hawj lwglan haenx. Hoenx ciengq le, ndoengfaex lij ndaej gemjngieg gij langgcung yenzswjdan, gemjnoix lwgminz sengmingh caeuq caizcanj deng sonjsaet. Sojyij, mboujlwnh dwg dingjcai、mbefat swnghcanj、gaijndei vanzging mbwndeih, lij dwg guh bwhhoenx, cungj itdingh aeu cagaenj cauh ndoeng loegvaq, caiq mbouj ca ne cix gvaiz lo.” Gij gvanhdiej de, byaij daengz gyawz cix gangj daengz gizde.

(caengz sat)