Sai: Bineix ndaej sam it

Simgib caengz baenzgya

Bohmeh mbouj danq ra

Baenz gadog dwgrengz

Sau: Gou haeuj ngeihcib bet

Vunz vet caengz bae haq

Boh guenj meh youh hah

Caj daegnuengx ndaej vunz

Sai: Vunz miz baz baenzgya

Caez roengz naz haeuj reih

Gangj riu sim vuen heij

Faenhgou ngeix dwgliengz

Sau: Ngoenz okdou roengz doengh

Raen gyoengqbang baenz doiq

Gag ienq mingh boihsoiq

Gizboih uet raemxda

Sai: Naj ranz nuengx raih naz

Ce nya ndwi ndaem haeux

Beix lienh lai lienh raeuh

Siengj cam aeu cauxmiuz

Sau: Ienquengj beix bouxsai

Miz naz baij baihnaj

Haet vang haemh youh gvaq

Mbouj gamj aj bak cam

Sai: Meh seng daeuj najmbang

Siengj gangj lau najmong

Sim go ngeix cam nuengx

Lau dongx mbouj han bak

Sau: Gvaqdaeuj vunz cam lai

Caengz haibak doengzeiq

Danghnaeuz mbouj yiemzheiq

Gyau hawj beix cauxmiuz

Hab: Songgyaeuj cungj gagonz

Caez gyonj daeuj guh bang

Buenq gaen doiq haj cangz

Niuzlangz boiq Ciznij

Doengzsaem youh doengzsim

Boux cim boux hab’eiq

Gietboiq guh fucei

Ndaej lumj lungz boiq fungh