Vanzgyangh Mauznanzcuz Swciyen Swh- wnh Cin Cunghsinh Siujyoz yawjnaek hong Cuengh Gun song saw vah sonhag. Lai bi daeuj, gyoengqde moix haggeiz cungj cujciz Cinghdanz、Sihnanz、Yinzhoz sam aen hagdangz lauxsae son Sawcuengh haenx comzyouq itheij, damqlwnh diuzloh Cuengh Gun song saw vah sonhag. Vihliux damqlwnh Cuengh Gun song saw vah doengzyamq sonhag, hawj hagseng yungh Sawcuengh daeuj hag ndei Sawgun, 11 nyied 27 hauh，Swh’wnh Cin Cunghsinh Siujyoz youq Yinzhoz Siujyoz gawjbanh goq damqlwnh Cuengh Gun song saw vah hozdung, 14 boux lauxsae yijvwnz Cinghdanz、Sihnanz、Yinzhoz sam aen hagdangz camgya goq damqlwnh. Doenggvaq goq damqlwnh gyaulouz hozdung, gaijbienq lauxsae sonhag fuengfap conzdungj haenx, daezsang gyoengq lauxsae gwnzdangz sonhag yisuz suijbingz.

Youq gwnz goq damqlwnh, lauxsae Sawcuengh Cinz Yivangj gangjgoq, gyoengq lauxsae dingq goq le caiq guh bingzgoq, daezok yawjfap swhgeij, siengj banhfap baezlaeng baenzlawz gangjgoq ndaej engq ndei. Mungz Ningz yaucangj guh bingzgoq cungjgez, de yauhgiuz sam aen Sawcuengh sawqniemh hagdangz neix aeu roengzrengz bae dajcaux daegsaek minzcuz siujyoz, hawj Cuengh Gun song saw vah sonhag banh ndaej engqgya hwngvuengh.