Siengzlungz Siujyoz dwg aen siujyoz ndaw mbanj Vujsenh Yen Dungzlingj Cin, seizneix miz 250 boux hagseng, 12 boux lauxsae. Aen hagdangz neix youq aen haggeiz neix ngamq guh Cuengh Gun song saw vah sonhag. Hag Vahcuengh youh hag Vahgun, gyoengq doengzhag yawjraen gig mizyinx. Bineix 12 nyied 3 hauh, aen hagdangz iq neix hai yindungvei, hoeng, bineix caeuq doengh bi gaxgonq mbouj doengz, bineix, hagdangz youq gwnz ciengzyindung venj diuzfuk sij miz Sawcuengh caeuq Sawgun, hawj yindungvei dem aen gingj ndeiyawj ndeu, hix hawj doenghboux yindungyenz iq roxdaengz lwg Bouxcuengh miznaj raixcaix.