●Gaenh bi daeuj, Ningzmingz Yen gyarengz youq 3 aen Yauzcuz cunh guh fuzbinz haifat, haenqrengz soengq fazliz、gohgi、vwnzva hawj 2000 lai boux beixnuengx Yauzcuz, gyagiengz baenzfouq naengzlig gyoengqde.

(Couh Yizgangh)

●Dangqnaj, Sanhgyangh Dungcuz Swciyen daengx yienh dajndaem gocaz menciz mauhgvaq 14 fanh moux. Mboengqneix, ndaw yienh neix gyoengq nungzminz cingq youq ngoenz mbwn ndei haeuj suencaz bae mbaet buek mbawcaz ceiq laeng.

(Yangz Mingz)

●Duenh seizcou laeng, Gvangjsih nungzyez bumwnz ca seizgan, daihlig doihaeuj seizcou seizdoeng dajndaem, daengz 10 nyied lajcib, daengx gih gaenq dajndaem doenghgo 1213 fanh moux, doengzbeij demlai 10 lai fanh moux. Dangqnaj cingq gyavaiq dajndaem, ceng ndaem daengz 1877 fanh moux.

(Yiz Sienghcenz)

●Daj 10 nyied ndawcib daengz 11 nyied co, Gveilinz Si Minzveij cujciz“minzcuz doxgiet senhconz siujfwnhdui”haeuj daengx si gak minzcuzyangh nem dieg saujsu minzcuz comzyouq haenx guh senhgyangj hozdung, dawz minzcuz cwngcwz dangj raeuz daiq daengz mbanj Myauzcuz nem Dungcuz, neix ndaej vunzlai angqcoux.

(Dangz Fanghsun Gungh Yungj)

●Daengz 10 nyied, Lingzyinz Yen lai miz suencaz youjgih 5000 moux doxhwnj, gaij ndei suencaz canjlieng daemq haenx 10000 moux; daengx yienh dangqnaj miz suencaz youjgih 11.2 fanh moux, cazsauj canjlieng 4512 dun, doengzbeij demlai 10.5%; canjciz 2.62 ik maenz, doengzbeij demhwnj 18.6%; hoh ndaem caz bingzyaenz souhaeuj 23240 maenz, moix boux souhaeuj 5189 maenz, beij bi’gvaq doengzgeiz demhwnj 18.6%.

(Loz Hihhaij)