Bonjbauq siusik (gicej Veiz Yennaz) 12 nyied 7 hauh laj- byonghngoenz, Gvangjsih Boux- cuengh Swcigih bi 2013 Vahcuengh Sawcuengh suijbingz gaujsi youq Nanzningz、Baksaek gawjhengz, itgungh miz 318 boux camgya gaujsi. Doenghboux camgya baez gaujsi neix miz guekgya gunghvuyenz、swyez danhvei bouxguenjleix、giyez cizgungh caeuq lauxsae gak cungj hagdangz、daihhagseng daengj, ndawde Bouxcuengh ciemq 89%. Nanzningz gaujdenj bouxgaujsi nienzgeij ceiq oiq 16 bi, ceiq geq 76 bi. Baez gaujsi neix, neiyungz baugvat Sawcuengh gihcuj cihsiz、 gyoebswz cauxgawq、 doeg saw lijgaij、Sawcuengh Sawgun doxhoiz caeuq sij faenzcieng. Gaujsi baen baenz sam gaep——cogaep、cunggaep caeuq gaugaep, bouxgauj cingzcik dab- daengz byauhcunj le(60 faen ndaej habgek), Swcigih Minzyijveij fat- hawj daengjgaep cwngsuh.

Bi 2012, Gvangjsih youq Nanzningz guh baez daih’it Sawcuengh Vahcuengh suijbingz gaujsi, ganbu ginzcung Bouxcuengh gangj gig ndei, baezneix gaujsi dwg baez daihngeih, lij youq Baksaek demgya aen gauj- den ndeu.

Guh Sawcuengh Vahcuengh suijbingz gaujsi, dwg gvancez dangj caeuq guekgya minzcuz yijvwnz cwngcwz fazgveih, baujcang gij gienzleih vah saw saujsu minzcuz, fazveih gij fuzvu goengnaengz Sawcuengh Vahcuengh youq ndaw sevei swnghhoz haenx, ndaej coicaenh Sawcuengh Vahcuengh byauhcunjva、gveihfanva、sinsizva fazcanj.