Mwh Guengjsae gak cuz ginzcung vihliux gozminz ginghci ndaej caenhitbouh ndeidauq cingq roengzrengz guh hong, bi 1963, fatseng liux baez cairengx haenqyak 80 bi cij bungq deng baez ndeu haenx.

Doiq baez cairengx haenqyak neix, gyoengq gak gaep ganbu caeuq gyoengq vunzlai, youq Cunghyangh dingjrengz caeuq Gihdangjveij、Gih- cwngfuj dazyinx lajde, ceiqheiq giengiengz dwk caeuq baez cairengx neix guh ciengzgeiz doxdingj. Gij ceh、go’gyaj cungj dai reuq lo, caiq ciengj doek ciengj ndaem, miz mbangj ndaej fanjfuk 4——5 baez doxhwnj. Ciengj ndaem roengzbae le, miz raemx cou raemx, mbouj miz raemx cix bae ra raemx, bauj ndaej doengh suenq doengh, bauj ndaej moux suenq moux. Saedcaih bauj mbouj ndaej go’gyaj, couh gaij ndaem gij doenghgo dingjrengx. Haujlai ganbu、vunzlai cungj cap youq henzdah, hwnz lienz ngoenz doxlwnz haenqguh, vunz yietnaiq ci mbouj ndaej yietnaiq, miz mbangj aeu lienzdaemh cou cib lai gaep, cij ndaej guenq raemx haeuj naz bae. Gyoengq lwgminz gamj caeuq mbwndeih doxdingj, hoenx hingz gannanz dingz heiqgaiq hungmbwk neix, gig gamjdoengh vunz ha.

Bi cairengx haenq neix, Guengjsae mbouj caiq lumj sevei gaeuq gaxgonq yienghhaenx dieg fwzrikrik, vunz dai doh biengz. Bi 1963, cawz haeux gemjok 48 fanh lai dun le, gij doenghgogai cujyau cungj ndaej daihfukdoh demcanj, ndawde gooij demcanj 47%, youzliuh demcanj 7%, ien’gang demcanj 1.7 boix, goyaed demcanj 65%, mak demcanj 30%, vaizcwz demcanj 7%, duzmou demcanj 47%, gaiqraemxok demcanj 30%. Gij canh’ok gunghyez dauq- swng, souhaeuj caizcingq demgya, hawciengz caenh’itbouh hwngvuengh. Haujlai doxgaiq ngoenzyungh gaxgonq aeu baengh cingq cix ndaej gunghawj roxnaeuz hanhliengh gunghawj haenx cungj mbehai gunghawj, gyaqcienz hawciengz caeuq baizgyaq guekgya doxca ndaej suksaeq. Daengx aen gozminz ginghci hainduj yaengyaeng ndaej cienzmienh ndeidauq lo.

(caengz sat)