Mbanjhaz dieg gvangq vunz noix, ndaem miz haujlai oij. Geij bi gonq, Mbanjhaz ndaw mbanj loh hung lueng iq cungj aeu suijniz bu ndaej bingzbwdbwd. Yienghneix, ranzlaeuzgaeuq Aungux couh yienh ndaej gaeuq lai lo, de gietdingh caiq guh aen laeuzmoq sam caengz ndeu.

Dauj caengz laeuz daih’ it ngoenzgonq, bouxcujcangj heuh Aungux ciuq giva cawx huq ma. Liuzngux hix naeuz Aungux aeu lai cawx di huq ma, mienxndaej dauj daengz buenq liuh mbouj gaeuq couh mazfanz lo.

Ngoenzlaeng banhaet, caezgya gwn haeux le couh dauj laeuz, miz mbangj doi sa, miz mbangj gej daeh yoengq suijniz, cujcangj youq gwnz- laeuz aeu geidaenhnaez do bae do dauq, bouxboux nyaengq ndaej hanh laeswsw. Sing gihgi daenh ndaej rwz yaek nuk bae. Seiz dauj yaek baenz, boux gej daehsuijniz daihsing heuh:“Aungux, suijniz mbouj gaeuq, baenzlawz guh？”

“Ha, gou gaenq lai cawx 10 bau ma, lij mbouj gaeuq？Ceng geij bau？” Aungux doeksaetyat, hanh conh liux naeuz.

“Daihgaiq lij aeu 6 bau. Seizneix heuh vunz yinh daeuj mbouj gip lo, sou yawj ndaw mbanj byawz miz, sien ciq de aeu, gvaqlaeng menh boiz de.”

“Gou rox ranz Lauxloeg miz, hoeng de mbouj ciq, cawx aeu de cij gai.” Mbouj rox byawz daih sing naeuz.

Aungux sikhaek doi ciiq bae ranz Lauxloeg, yungh 240 maenz cawx ndaej 6 bau suijniz ma.

Gvaqlaeng, Liuzngux naeuz Aungux:“Gou heuh mwngz gaej nyen lai ha, vunz bau lai aeu 20 maenz hix ngaiz cawx, nyen lovei.” Aungux dingq le, cij dwg gyangzheiq mbouj gangj vah.

Gvaq mboengq ndeu le, youh daengz cang benjmozbanj caengz daihngeih lo, Aungux cawx ndaej 2 sieng 36 gaen dingdiet ma. Cuj caepranz ding benj ndaej dingz ndeu, couh mbouj miz dingdiet lo. Aungux youh deng gwih mohdoz bae cawx. Ranz de liz haw 20 lai leix loh, de bae haw dauqma gaenq naiq liux. Liuzngux youh naeuz de:“Mwngz youh ienqhoij mbat ngeih lo, deng cawx couh cawx ma.” Aungux dingq le, lumj bouxngoemx nei gangj mbouj ok vah daeuj, de ngeix: Mienhlaeuz miz bak haj lai bingzfueng gvangq, couh yungh 3 sieng dingdiet, mbouj aeu baenzlai ba? Gou bae yawj gonq. Aungux byaij daengz laj mienhlaeuz, sijsaeq cazyawj, raen dingdiet doek gig siuj. De daeuj daengz gwnz mienhlaeuz, cujcangj riu dwk doiq de naeuz:“Duhvunz diuz bahdingj ndeu ding naeb dingdiet ndeu, duhmwngz couh ding song naeb, ndigah lai aeu di ding. Aungux mwngz cuengqsim, cuj bouxwnq miz vunz caeg huq bouxcawj gou mbouj rox, gou bau cuj dou mbouj miz vunz caeg. Hongdawz duhdou cienzbouh ce youq ranz mwngz, gwnz mohdoz dou cij miz bingz raemx ndeu, dou daeuj gaenh 30 ngoenz, haemhhaemh mwngz raen dou fwngz hoengq baema.” Aungux naeuz:“Saedcaih dwg yienghneix. Hoeng, guh hwnjdaeuj beij giva vihmaz lai aeu baenz lai liuh?” Cujcangj naeuz:“Aungux, guh laeuzmoq cungj aeu feiq cienz, seizneix lai yungh di hoi、 suijniz、 dietdiuz mbouj youqgaenj, caj guh baenz le, mwngz siengj lai cuengq di huq roengzbae hix mbouj ndaej lobw. Vahsug naeuz, ‘gwn duhvunz haeuxngaiz, youz vunz baiz hongguh’，sou doiq dou baenz ndei, sou youq mbouj youq henz neix, dou cungj dwg doengzyiengh guh ndei hawj sou.” Aungux naeuz:“Deng, yienghneix cijbaenz.”

Vihliux guh ndei laeuzmoq, Aungux ca mbouj lai ngoenzngoenz bae haw cawx byaek cawx huq. De ngeix, aeu dakdaih cujdajcaep ndei di, aeu ciengzseiz vuenh byaekndei, sawj gyoengqde guh hong lai lauxsaed. Liuzngux ngoenzngoenz youq ndaw ranz dajcawj nyaengq faenfoen, song gvanbaz gig siuj miz seizgan bae gamhong.

Miz ngoenz ndeu, ranznden miz song laeq lwgnyez loeng daeuj laeuz gaeuq Aungux guhcaemz, songde doxceng aeu hoinaez youq bangx- ciengz gwnz daeh luenh veh 123, loengh ndaej dinfwngz uq hoi liux. Aungux yaek bae haw, raen le, hozndat naeuz:“Gvaiz yiemz gvaiz, youh nyangz vaiz doxdaemj. Caj gou swiq sou gonq, caiq bae haw.” Aungux gangj sat couh rag songde bae laj suijlungzdouz swiq dinfwngz.

Aungux bae cawx byaek dauqma daengz henzmbanj, couh bae ndaw reih’oij oknyouh. De raen ndaw ruengzoij miz geij doi mbawoij, couh bae biengj daeuj yawj. Baez yawj, de doeksaet liux…… De ganjvaiq dauq- ranz gaj bya swiq dungxmou.

Seiz gwnhaemh, cujcangj cam Liuzngux:“Haxbaenh raen Aungux swiq dungxmou, vihmaz mbouj cawj？”

“Lauxngux naeuz mbouj hawj gwn baenzlai lo, ce di ngoenzcog gwn.” Liuzngux naeuz.

“Aungux vihmaz mbouj daeuj gwn caeuz? Cujcangj cam.

“De bae bang sou yawj mohdoz.” Cujcangj baez nyi nyaenx gangj, heuh “ha” sing ndeu, dawh ndaw fwngz doek lo, de naeuz: “Bya ndat lai, raemxdang rwih haeuj fwngz daeuj……” Caezgya cungj riu hwnjdaeuj.

Gwn caeuz sat le mbwnfuemx lo, cujdajcaep bouxboux gwih ci hai daeng baema. Cujcangj byaij ceiq doeklaeng.Yaep he, cujcangj dingz roengzdaeuj, bae ndaw reihoij umj bau suijniz ndeu okdaeuj cang gwnz ci bae, youh caiq bae ndawreih dawz daeh diet ndeu okdaeuj(diet diuz dwg gienj baenz gien), cug ndei lo, couh yaek haici baema. Cingq youq seizneix, Aungux sawqmwh ndwn youq baihnaj, de doiq cujcangj naeuz: “Gwnz daeh veh miz 123, mwngz lij miz maz gangj？Yienzlaiz sou dwg caj bouxcawj seiz mbouj youq, sien caeg huq ok dou yo, mbwnlaep couh doz baema ranz sou.” Aungux gangj sat, sikhaek bae gwnz ci cujcangj dawz bingzraemx hwnjdaeuj, hai fa dauj okdaeuj, naeuz: “Mwngz yawj, ndaw bingz cang rim dietding bw……” Cujcangj raen lohrieng le, sim vueng naj bienq heu, gipmuengz naeuz: “Dou……dou…… dou loek lo, dou caeg geijlai huq, dauq boiz hawj mwngz, cingj mwngz gaej gangj okbae, cienfanh gaej gangj okbae.” Aungux naeuz: “Mwngz bau cuj mwngz mbouj guhcaeg, bau viz. Hai, doengh gij huq neix dij viz cienz ma, sou ngoenz cienzhong boux bak lai maenz, nanzdauh aeu bae cawx gij huq neix mbouj ndaej？Bonjlaiz sou bang vunz guhranz dwg goengdaek sou, hoeng sou guhcaeg aeu couh miz coih lo. Caeg ciengj ndaej cienz huq baema guh ranz, sou youq mbouj vuengh ne. Ndaej lo, gij vunz byaij gonq haenx gou mbouj gaemh lo, mwngz hix baema ba, lij aeu geijlai suijniz, ngoenzcog gou bang mwngz cawx, vat viz……”

Ngoenzlaeng, cuj neix mbouj raen daeuj bang Aungux caep laeuz lo, cig daengz seizneix lij mbouj raen gyoengqde bae caeuq Aungux suenq ngaenzhong dem. Ceij bau mbouj ndaej feiz. Daj seizhaenx hwnj, boux guh ranzmoq mbouj raen sied huq lo, aenvih gwnzmbanj cienz miz gawqvah ndeu: Gaej lumj “cuj 123” haenx bw, baez ngaiz cog couh ienqhoij seiqvunz ha!