Seizhah gaenq caegcaeg byaijdeuz lo. Seizcou, gaem ci bit caijsaek he daeuj lo.

“Sasasa……” Gwnz gofaex gij mbaw henj haenx deng rumz ci loenq roengz daeuj, cw youq gwnz dieg, gwnz dieg lumj bu fan danj saekhenjgim he. Caij hwnjbae, yiengjsasa. Miz di mbawfaex gig manzgyaengj, naengh youq gwnz ndang rumz, youq gyangmbwn bi buengqyed. Miz di gaenriengz rumz dahcej, saet neix mbin de guhcaemz. Gyoengqde yaep ndeu mbin hwnj mbwn bae, yaep ndeu youh ma ndaw rungj daihdeih daxmeh. Miz di dang swhgeij dwg duz mbungqmbaj, aj fwed yegyeg, youq gyang mbwn diuqfoux. Miz di mbawfaex dauq gikgyadgyad, nem gofaex daxmeh mbouj haengj roengzdaeuj. Hoeng gyoengqde caeuq rumz dahcej ciengqgo, ciengq diuz go seizcou. O! Rumz dahnuengx hix daeuj lo. De daiq haujlai baengzyoux iq daeuj, gyoengqde buet dwk, diuq dwk, gip mbawloenq guh byauhbwnj. Gip gij mbaw haenx, mbaw nding nding lumj feiz, mbaw henj henj lumj gim, mbaw heu dauq yienj ndaej gig sengdoengh, gij mbaw gyoengqde gip haenx, lai saek lai yiengh, yienghsiengq geizgvaiq.

Mboujdanh dwg gij mbaw- loenq seizcou raiz yuk raiz yaek, gij lwgmak seizcou engqgya lai cungj lai yiengh. Ndaw suenmak, youq gyae yawj bae, makleizsan bak dek yadyad, loh baenz baiz baenz baiz heuj ndongqrikrik riu dwk, lumjdwg dawz naedcaw soengq hawj seizcou. Bingzgoj najnding lo, couh lumj baenz aen baenz aen daengloengz venj youq gwnz nyefaex. Gij makleiz henj- rwgrwg haenx mwngz ing gou gou ing mwngz, couh lumj gyoengq nyezhozloz he cingq gangjgoj sebseb. Doenghnaz haeux henj haenx couh lumj aen haij saekgim, rumzcou baez ci, foeb hwnj foeb roengz, ndit baez ciuq, fubfeb ndangqrik.

O! Gou gyaez seizcou, gyaez seizcou gyaeundei, hoeng gou engq gyaez seizcou lai saek lai yiengh.

(haj nienzgaep Sung Ginghcouh)