Gyoengq vunzraeuz riengz seizgan baenaj, bi’ndwen maj- hung, gij buh daenj gvaq haenx yied daeuj yied lai, ndaw gvih dong baenz dong, gij buh mbouj daenj haenx gveng youh hojsik, sai haujlai cienz youh mbouj vanzbauj. Ndigah, gou fatmingz geu buh neix, daengxciuh cij aeu geu ndeu.

Geu buh neix gig fueng- bienh, de rox gaenriengz vunz bi’ndwen、sang daemq、biz byom bienq gvangq bienq gaeb roxnaeuz bienq dinj bienq raez, geu buh neix mbouj yungh gijmaz gunghgi hojyungh daeuj gamhanh, baengh aen uk swhgeij couh ndaej diuz geu buh neix, yienghbuh、saek、mienhliuh、ndei mbouj ndei yawj、cizlieng daengj cungj youz swhgeij maij yiengh lawz couh diuz yiengh de, cig daengz swhgeij muenxeiq.

Geu buh neix ndaej seizseiz diuz vaendoh, couh lumj geu buhgunghdiuz he. Seizhah daenj de, gig liengzsangj, lij ndaej cwdangj mbouj hawj swjvaisen ciuq daengz ndaw. Seizdoeng daenj de, roxnyinh gig raeujrub, aenvih geu buh neix gig mbaeu, ndigah mbouj fuengzngaih gyoengqvunz saek loh, yaek doxbuet dwkgiuz cungj ndaej. Seizcin caeuq seizcou daenj couh mbouj nit mbouj hwngq. Geu buh neix lij cang aen cuengq yinhyoz youq ndaw, siengj dingq gijmaz couh dingq gijmaz, gij sing hix daih gvaq lo, mbouj rox sieng daengz aenrwz vunz. Caemhcaiq, gij sing yinhyoz lij rox gaengawq bouxvunz youq dieg lawz bienq sang bienq daemq, gij sing haenx cijmiz boux daenj geu buh haenx cij gag dingqnyi, yienghneix seiqhenz couh mbouj rox deng singyaem gyuk uqlah lo.

Geu buh neix lij cang miz aen singyaem daezsingj, mwh mwngz dingq go haeuj maez gvaq maxloh seiz, rox miz yungyiemj, seizneix yinhyoz sikhaek rox daengx roengzdaeuj, conj baenz sing daezsingj, caj daengz mwngz daengz dieg ancienz seiz, cij dingz roengzdaeuj. De mboujdanh rox daezsingj, lij rox gag saeg buh caeuq gag ci hawq dem.Caezgya cungj mbouj yungh you saeg buh lo, yienghneix ngoenzngoenz cungj youq soeng simyungz.

Seizneix gwnz ndang vunz- raeuz gij sigin haenx geq cungj geq mbouj liux, doiq ndangvunz gig miz haih, yienghneix geu buh gou youh daegbied miz yungh lo, de ndaej cawzraeg gij sigin gwnz ndang vunz, hawj daengx ndang sangjloebloeb. Geu buh neix lij naengz bang vunzraeuz baujgen、meijyungz、dub hwet soeng nyinz dem…… Cingq lumj vunz gangj “cib bet cungj gungfou yiengh- yiengh cungj caezcienz”, de siumied gij buh baeznaengz daengxcungq gezdenj, cij ce gij ndeicawq ndei daenj ndei yungh de.

Gou maqmuengh geu buh goengnaengz lai neix moix ngoenz vih vunzraeuz swnghhoz dem angq dem gyaeu.

(sam nienzgaep Lij Siengj)