Gomakgaem yenzgiusoj laeb youq Gveilinz, sojcangj Cwngh Menj yienzlaiz dwg boux sojcangj Cunghgoz Gohyozyen Cwngzduh Gomakgam Yenzgiusoj ndeu. De daengz Guengjsae canhgvanh le, nyinhnaeuz youq Guengjsae ndaem gomakgam diuzgienh ndei gvaq Swconh, siengj senj Cwngzduh Gomakgam Yenzgiusoj daengz Guengjsae, hoeng caengz ndaej gij bumwnz cawjguenj doengzeiq gvaq, ndigah, daezok youq Guengjsae guh aen sojnga ndeu. Se Dunghlaiz lwnh gij cingzgvang neix hawj Veiz Gozcingh dingq le, Veiz Gozcingh naeuz:“Ndei ha, byawz siengj daeuj Guengjsae nei raeuz cungj angqcoux de! Daeuj daengz le, aeu boiq ci caeuq hwnj ranz hawj de.” Hojsik, boux lauxhangz gomakgam neix ngamq daeuj daengz mbouj geij nanz, “vwnzva dagwzming” cix hainduj lo, de fouznaih deng bik deuz ok Guengjsae.

Vihliux fazveih gij akcawq dangzoij Guengjsae, Veiz Gozcingh ok le rengz gig laux. De lai baez bae daengz Gveiyen Dangzcangj、Gveibingz Dangzcangj caeuq gij dangzcangj wnq, liujgaij caeuq ngeixyaeng gij vwndiz mizgven dangzoij haenx. De caenndang cujciz gij hoih cwngfuj banhgoeng, ngeixyaeng caeuq dingh gij giva swcigih ndaem gooij caeuq guh dangzcangj haenx. Ciuq gij yigen de, swcigih laebbaenz aen Dangzoij lingjdauj siujcuj, gvaqlaeng gaij guh dangzoij swnghcanj bangunghsiz, fucwz hezdiuz、 gyoebcomz cauh’ok yienzliuh caeuq gyagoeng. Mwh de lij youqnyaemh, gooij ndaejsou 280 lai fanh dun, canj dangz 27 fanh lai dun. Gvaqlaeng geij gaiq dangjveij caeuq cwngfuj swcigih, itcig dawz hong dangzoij dangq aendongh ginghci cujyau ndeu daeuj ca. Daengz seiz satbyai “8.5 giva”, Guengjsae gooij ndaejsou 2500 lai fanh dun, canj dangz 170 lai fanh dun, baenz le aen dieggoek ok dangz daengx guek ndeu. Daj neix hwnj, hong gooij Guengjsae doiq guekgya gung’yen ngoenz beij ngoenz laux.

Sizcenj cingqmingz, Gihdangjveij youq bi 1963 daezok gij fuengcim mbefat nungzyez haenx habngamj gij saehsaed Guengjsae. Caenhguenj doeklaeng guekgya haeuxgwn gaenj, yingjyangj hengzguh fuengsim neix duenh ndeu, hoeng seizneix de doiq sonyinx Guengjsae guh hong nungzyez ciuqyiengh miz yiyi hungnaek.

(caengz sat)