Dingq bouxgeq lwnh, gaxgonq, miz song ranz vunz gig fouqmiz, song ranz gek diuz Dahyougyangh dangq youq, yienznaeuz song ranz liz haemq gyawj, hoeng ngoenznaengz song ranz vunz mbouj miz maz laeujcaz baedauq. Ranz dah baihswix miz daeg mbauq ga’gvez daliuq ndeu, ranz dah baihgvaz miz dah sau heujdit gemjmbot ndeu; ranz daeg mbauq cingj daeg mbauq sangmaengh ndeu guhhoiq, ranz dahsau hix cingj dah hoiq gyaeundei ndeu daeuj bangfwngz.

Song bouxcoz nienzgeij ngoenz beij ngoenz geq lo, aenvih song boux de dwg vunz yakfaz, yienznaeuz ndaw ranz ngaenzcienz rim sieng gwndaenj mbouj you, hoeng cix mbouj miz vunz nyienh cam song boux de guhyoux, neix hawj song baih bohmeh simnyap hwnjdaeuj. Vih yienghsiengq lwglan ciuhlaeng dajsuenq, bohmeh daeggvez maqmuengh daeglwg ra ndaej dah sau gyaeundei ndeu guhyah, ranz dahsau hix maqmuengh dahlwg haq hawj daeg mbauq sangmaengh ndeu. Song ranz vunz dawz gij siengjfap neix daengq yahmoiz bang ra, hoeng ra bae ra dauq hix ra mbouj ndaej boux hab aen diuzgen neix. Doeklaeng yahmoiz naemj: Gawqyienz song ranz cungj dwg ranzfouqmiz, caemhcaiq song bouxcoz nienzgeij youh doxboiq, danghnaeuz gap baenzdoiq hix mbouj loek ne! Yienghneix, yahmoiz genj ngoenzndei ra dieg hawj songde cimnaj.

Song bouxcoz byawz cungj lau okdou raennaj, doeklaeng song baih iekdingh: Hawj bouxsai vad ruz bae baihhamq de doxraen.

Ngoenz cimnaj yaek daengz lo, daegmbauq sim’angq raixcaix, de dingq gangj dah haenx dwg lwg ranzmiz, vunz itdingh gig gyaeundei, swhgeij ga’gvez daliuq, lau dah haenx yiemz, ngeix bae naemj dauq, doek- laeng de naemj ok aen cawjeiq ndei ndeu. Baihde, dahsau siengj daengz gij yienghsiengq bonjfaenh, sim hix gip hwnjdaeuj, baenzlawz cij hawj daegmbauq yawj hwnj swhgeij ne? Dahsau hix siengj ok aen banhfap ndei ndeu.

Ngoenz cimnaj daengz lo, daeg- mbauq vad aen ruz gvaq dah bae, gyaeujruz ndwn daeg mbauq sang- maengh ndeu. Laj go’ndoek haenzdah hix ndwn dah sau gyaeundei lumj dahsien ndeu, song bouxde doxraen le doq vad fwngz doq ngaek gyaeuj, song ranz vunz cungj roxnyinh song bouxde doxboiq dangqmaz.

Gvaqrap geij baez couh daengz ngoenz guhlaeuj lo, ngoenz haenx song ranz vunz gaj mou gaj bit, gak cingj daengx mbanj vunz daeuj gwn laeuj, nauhyied raixcaix! Ranz dahsau angqyangz soengq lwg ok dou, ranz daegmbauq vuenheij ciep bawx haeuj ranz. It baiq mbwndeih, ngeih baiq cojcoeng, gvanbaz doxbaiq, guh sam baiq le, gwizmoq yinx bawxmoq haeuj rug bae naengh, youh dawz nengqrwz goenhgim okdaeuj raek hawj bawxmoq, yienghyiengh guh sat le, sim diuqbubub, couh yaek biengj mbaw baengzhoengz gwnz gyaeuj bawxmoq, gwizmoq muenxeiq dwk siengj: Swhgeij yungh geiqmaeuz aeu ndaej bouxbawx baenz gyaeundei, ciuhvunz neix gaeuq bonj lo. Mwhde, bawxmoq hix naj hoengzfedfed, sim’angq dwk siengj: Gwizmoq maj ndaej baenz sangmaengh, swhgeij caen dwg “meuzmengz daemj nounaeuh” lo. De maqmuengh gwizmoq vaiqdi umj de hwnj mbonq bae, “haeuxsan cawj baenz haeuxcug” le yienghlawz cungj mbouj lau lo. Seizneix, song boux de baez biengj mbaw baengzhoengz, song boux sikhaek naj bienq doeksaet hwnjdaeuj.

“Meh ha!” Bawxmoq daej hwnjdaeuj ndaq naeuz:“Ngoenz cimnaj boux ndwn gyaeujruz baenzlawz dwg boux ga’gvez daliuq ne!?” Gwizmoq hix hujdengdeng ndaq naeuz:“Goujndeuzboz lo! Ngoenzhaenx mingzmingz dwg dah gyaeundei ndeu caeuq gou ngaek gyaeuj vad fwngz, ngoenzneix vihmaz dwg bienqbaenz dah heujdit gemjmbot ndeu ne!?” Song boux de youq ndaw rug doxceng hwnjdaeuj, boux mbouj nyiengh boux, ca di doxmoeb hwnjdaeuj, doeklaeng cijndei heuh yaxmoiz bae ra hakdoj bingzleix.

Hakdoj cam:“Dwg bouxlawz bang sou guhmoiz ne?” Songde vix yahmoiz naeuz:“Dwg yah de.” Hakdoj cam yahmoiz:“Nanzdauh mwngz guh moiz mbouj gangj cingcuj ha?” Yahmoiz han naeuz:“Song ranz de soengq cienz hawj gou guhmoiz, gou saedcaih mbouj miz banhfap ra boux diuzgen ndei daeuj boiq song boux de, hoeng gou raen song ranz de dwg ranz fouqmiz, doiq bouxcoz neix gak fuengmienh youh doxboiq, wngdang mbouj boux yiemz boux, gou couh genj ngoenzndei hawj songde youq henz dah cimnaj, mwhde song ranz vunz roxnyinh muenxeiq dangqmaz, baih mbauq soengq rap le couh dingh ngoenzndei cingj laeuj lo, gienh saeh neix dwg song ranz de guhcawj, mbouj gven gou ha!”

Laxlawz ngoenz doxcim haenx, Daegmbauq lau dahsau yawj mbouj hwnj de, couh hawj bouxhoiq cang de ndwn gyaeujruz vad fwngz, daegmbauq cix cang guh bouxvadruz. Siengj mbouj daengz, dahsau hix lau baihde yawj mbouj hwnj swhgeij, hix heuh dahhoiq ranzde daeuj dingj de ndwn henz dah, de cix ndoj youq baihlaeng cazndoek laeglemx yawj, seizneix song bouxcoz cix rox ienqhoij lo.

Hakdoj rox laizyouz le, riuhaha hwnjdaeuj naeuz:“Ndeuujgak boiq bouxgvez, daliuq boiq gemjmbot, baenz ha! Yawj gij yienghsiengq song boux sou dwg gig doxha, neix dwg gwnzmbwn boiq hawj, mbouj ndaej doxyiemz! Caiqnaeuz saundei boiq mbauqmaengh hix baenz doiq ndeu, couh dwg yienghneix dingh roengzdaeuj!”

Song bouxcoz dingq le roxnyinh vah hakdoj gig deng, couh angq dwk guh gvanbaz lo. Caen dahraix hab vah bouxhakdoj, mbouj geij nanz, song boux hoiq haenx hix lingh gap baenz gvanbaz lo.