Daj bi’gvaq daeuj, Mungzsanh Yen Cangzbingz Yauzcuz Yangh Luzbingz Cunh gyoengq beixnuengx Yauzcuz byaij diuz roen“hamj yangh fazcanj”, dajndaem ginghci nungz- cozvuz, seizneix gaenq youq Mungz- sanh Vwnzhih Cin laeb lai aen lwgmak nem byaekgwn gihdi, mizyauq dwk hawj gyoengq beixnuengx Yauzcuz laisou, aeundaej ginghci yauyiz haemq ndei.

Cangzbingz Yauzcuz Yangh Luzbingz Cunh yienznaeuz miz swhyenz raemx nem mbwn maenh- ndei, caemhcaiq vunzmbanj rox ndaem gva nem lwgmak, danhseih diegrin lai diegnamh siuj, loh mbouj bienh, mbouj hab aeu gihgai daeuj guh dajndaem, neix couh gaz nungzyez dangdieg fazcanj. Cimdoiq gij cingzgvang neix, gyoengq beixnuengx Yauzcuz dangdieg cauxok“hamj yangh fazcanj”mozsi, mbouj deng dieg laengz haeuj, youq Vwnzhih Cin、 Hozcunh Cunh gij dieg bingz、namh biz、 roen bienh、ngaenzco bienzngeiz haenx lwnz ndaem“hing-gvehoengz- byaek”.

Bi’gvaq, Luzbingz Cunh cijmiz 4 ranz Yauzcuz youq henzdah dajndaem byaekgwn, bineix gaenq gya daengz 8 ranz,“hamj yangh fazcanj”aen mozsi neix cingq cugmbaek demhung, cunhcihsuh Vangz Cinhmeiz couh sien gyahaeuj“hamj yangh fazcanj”ndawde bae, de mboujdanh bau 20 moux dieg ndaem hing nem gvehoengz, lij laebbaenz aen giyez iq “gimbauj”lwgmak nem byaekgwn gihdi neix. Dangqnaj, Cangzbingz Yauzcuz Yangh Luzbingz Cunh laebbaenz giyez iq 6 aen, youq Vwnzhih Cin bau 100 lai moux lwgmak nem byaekgwn gihdi, bi canjciz 10 daengz 80 fanh maenz.

(Liuz Gozvwnj)