Gaenh bi daeuj, Vuzcouh Si aeu sam aen cosih, gyarengz youq dieg saujsu minzcuz guh gihcuj sezsih gensez, aeundaej cingzcik ndei.

It dwg cungfaen leihyungh gij cienzngaenz fazcanj saujsu minzcuz haenqrengz youq dieg saujsu minzcuz guh gihcuj sezsih gensez. Daj 2008 nienz daeuj, aen si neix minzveij hidungj cizgiz ceng ndaej gij cienzngaenz fazcanj saujsu minzcuz guekgya gaep nem swcigih gaep haenx gungh 1350 fanh maenz, saehhengz 130 lai aen hanghmoeg, si bonjgaep hix bued gij cienzngaenz cienhangh fazcanj saujsu minzcuz 300 lai fanh maenz, yungh daeuj coengh gij mbanj diegbya gyae haenx coih roen guh giuz, hwnjguh yinxraemx gunghcwngz daengj, mizyauq gaijndei gij gihcuj sezsih diegbya gyae saujsu minzcuz.

Ngeih dwg saedhengz baez fuzbinz haifat gunghgenhcan moq ndeu, gyavaiq guh gihcuj sezsih dieg saujsu minzcuz. Bi’gvaq, aen si neix dawz Cangzbingz Yauzcuz Yangh Cangzbingz Cunh、Yayiz Yauzcuz Yangh Luzhaij Cunh、Dwngzyen Daliz Cin Ningzgangh Cunh daengj 25 aen cunh saujsu minzcuz comzyouq haenx ndaej lied haeuj aen si neix gij mbanj dingh youq“Cibngeih Haj”guh diemj fuzbinz haenx. Dan 2011 nienz daengz 2013 nienz, aen si neix roengz gij cienzngaenz fuzbinz hawj Yayiz、Cangzbingz song aen saujsu minz- cuz yangh haenx gungh 245.34 fanh maenz. Doenggvaq saedhengz buek cosih fuzbinz he, dieg saujsu minzcuz gij gihcuj sezsih gensez engq vaiq.

Sam dwg aeu yangh gingq guh gihvei, cungdenj gaijndei song aen Yauzcuz yangh gihcuj sezsih. Bimoq nem birawz faenbied dwg aen si neix Cangzbingz、Yayiz song aen Yauzcuz Yangh laebbaenz 30 hopbi, Vuzcouh si、yienh、yangh sam gaep dangjveij、cwngfuj cadawz seiz daegbied neix, gyarengz coengh song aen yangh neix fazcanj gihcuj sezsih gensez. Doenggvaq saedhengz buek gihcuj sezsih hanghmoeg gensez, song aen yangh neix gihcuj sezsih gaijndei gig lai.

(Liuz Gozvwnj)