Youq ndaw yienhsingz Sihlinz Yen, moix daengz ngoenzhaw, diuzgai gai baengzdoj buhdoj haenx ceiq nauhyied, gyoengqvunz daeuj cawx huqdoj ceiq lai, cungj haenh naeuz baengzdoj ndeiyawj youh naih daenj.

Youq lajmbanj Sihlinz Yen, ranzranz cungj miz congzrok, boux- boux mehmbwk cungj rox daemj baengz. Gyoengq mehmbwk gag daemj gaiqninz、 mbuk nda lwgnyez. Vihliux sawj doengh gij gaiqdaenj gaiqyungh neix engqgya gyaeundei, gyoengqde lij youq gwnzde siuq gak cungj gak yiengh dozanq. Baez daengz ngoenzciet, gyoengq vunzmbanj couh daenj buhvaq bonj minzcuz gyaeundei neix, ciengq go diuq foux, angqhoh ngoenzciet.

（Vangz Yenginz）