Nyez ngamq seng hainduj baenz feiyenz seiz, itbuen dwg baenzneix: Fatndat、ae goebgoeb、mug rih、cingsaenz naiqniek、sing daej saeqset、diemheiq vaiq youh mbouj miz gveihcwz. Youqgaenj seiz aenvih diemheiq sinhoj cix naengbak fat aeuj、giuzndaeng saenqdaenh daengj.

Nyez ngamq seng baenz feiyenz, wng gibseiz soengq bae yihyen ceihyw, bingh naek cix louzyih duenq yw. Caengz bae yihyen gaxgonq, youq ranz ceihyw cujyau dwg gyagiengz hohleix. Gidij hohleix fuengfap miz baihlaj geij aen fuengmienh:

(1) Vanzging. Ndaw rug aeu doeng rumz、seuqcingh. Mwh baet rug uet rug seiz, wng aeu dohbaj cumx daeuj uet, fuengz faenx mbin hwnj gig saidiemheiq de baenz ae engq haeuj naek. Vih hawj hoengheiq riuzdoeng dei, moix ngoenz aeu hai cueng vuenh heiq 2 daengz 3 baez, moix baez 20 daengz 30 faen cung, dohraeuj ndaw rug aeu baujciz miz 18 daengz 20 doh, dohmbaeq 55 daengz 65 doh. Naengh hoengheiq hawq lai, ndaej cuengq aen huzraemx mbouj saek bakoet ndeu hwnj gwnz loz bae, hawj raemxfwi ci haeuj ndaw rug bae demgya dohmbaeq, mienxndaej lwgnyez bak sauj linx hawq.

(2) Gwnndoet. Lwgnyez baenz feiyenz geizgan, aeu hawj de gwn raemx、gijgwn ndat、veizswnghsu lai youh yungzheih siuvaq haenx. Ciengeiz gaej duenhcij, naengh lwgnyez mboetheiq youqgaenj, diemheiq sinhoj, ndaej nyaenj raemxcij roengz beuzgeng bae menhmenh bwnq de. Mwh bwnq raemxcij seiz, ndaej heuz di raemxreiz ndeu, lwgnyez loq hung ndaej bwnq di haeuxcuk、mienhdiuz yungz、dang gyaeqgaeq ndeu, baujcwng aenndang de miz raemx caeuq veizswnghsu cuk- gaeuq.

(3) Bauj raeuj. Seizdoeng seizcin mbwn haemq nit, aeu daegbied haeujsim bauj raeuj, danhseih aeu habdoh, mwh fatndat seiz aeu gej gaetbuh gaetvaq biengj denz, mienxndaej de fatndat doeksaet linjlau roxnaeuz ok hanh lai, supsou raemxhanh caeuq gij ndat naengnoh fwifat rox hawj de deng liengz, binghcingz engq haeuj naek.