Gij saeh gou nanzlumz haenx, ndawde miz gienh he gou ceiq nanzlumz, couh dwg bi’gvaq nguxnyied cibngux suek faengx.

Gou sien dawz song mbaw rongfaengx cimq raemx yaepndeu, yienzhaeuh daeb hwnjdaeuj, fwngz he gaem, lingh fwngz he dawz mbaw menhmenh gienj haeuj ndaw, gienj baenz aen boi samgakhingz he,gij gak soem de itdingh aeu hab maed, mboujnex haeux rox loh okdaeuj. Gou dwg suek faengxnoh, aeu hamh noh youq cungqgyang. Sien dwk sieg haeux he, cang rim aen boi samgak haenx, menhmenh bongx mbat he hawj haeux coeb roengzbae. Ciep roengzdaeuj ceiq gvanhgen lo, dawz gij fwed mbaw boeb roengz dimz bak boi maenh bae. Aenvih dwg baez nduj suek faengx, ndigah aen faengx gou suek haenx mbouj baenz yiengh. Gou lienzmuengz aeu geu fiengzsauj he, hix goq mbouj ndaej fuengfap lo, raen gizlawz soeng couh heux gizde geij mbat, dauqdaej suek ndaej aen he lo. Yienznaeuz gij yiengh aenfaengx mbouj lumj yahdaiq guh haenx ndeiyawj, hoeng gou ndawsim angqfwdfwd. Gou itgungh guh le caet aen, couh lumj caet aen yinhfuz angqyangz nei.

Aen faengx heiq ndatfwdfwd rangfwtfwt daengz ndaw fwngz gou seiz, gou sijsaeq yawj dwk, menhmenh haeb amq iq he, miz raq diemzsub he lae roengz dungx gou bae.(seiq nienzgaep Se Fanz)