Mbwn laepsuemsuem, yaepndeu fwn doeksese roengzdaeuj, seizneix, duz nyaenma he gag mbwq gag daejngw’ngw…… Laxlawz de boux ndeu gag youq ranz, raen vunz cungj miz baengzyoux buenz、miz baengzyoux guhcaemz、miz baengz- youx bangcoh, couh swhgeij gag siengsim, seizneix de gietsim okbae gyau baengzyoux.

Nyaenma byaij dwk byaij dwk, daeuj daengz henz rij, yawjraen moulwg caeuq bitlwg itheij guhcaemz, couh hwnjbae riu dwk doiq bitlwg naeuz:“Caeuq gou guh baengzyoux ndaej lwi?” Bitlwg fwt raen nyaenma, doeksaet dwk laemx bae. Bitlwg benz hwnjdaeuj doiq nyaenma naeuz:“Mbouj ndaej, baez raen mwngz couh mboujmiz saeh ndei. Baezgonq couh dwg raen mwngz, gou cij deng daxmeh ndaq!” Nyaenma siengsim dwk yawj moulwg, moulwg ngamq siengj naeuz“gou doengzeiq”, bitlwg gaenq ciengj naeuz gonq:“Moulwg, gaej lumz lo, baezgonq de youq dangqnaj vunzlai naeuz mwngz rwix, doeklaeng gyoengq baengzyoux mwngz cungj mbouj leixlangh mwngz lo.” Moulwg dingq le, lienzmuengz doiq dauq laeng geij yamq, saenzdedded dwk doiq nyaenma naeuz:“Dwg ha, baez bungz mwngz cungj mboujmiz saeh ndei.” Gangj sat, moulwg caeuq bitlwg cungj byaijdeuz lo.

Nyaenma doeknaiq lo, hoeng de gag nai swhgeij naeuz: “Gou itdingh mbouj naengz yienghneix couh suenq lo, itdingh miz vunz haengj caeuq gou guh baengzyoux.” Nyaenma byaij daengz dangqnaj goengq bya he, cingqngamj, miz duz muilwg he cingq yaek hwnj bya bae. Nyaenma buet bae coh duzmui haenx, gaem dawz muilwg cik fwngz he gouz dwk naeuz:“Caeuq gou guh baengzyoux ndaej lwi?” Muilwg menhmenh hai bak naeuz:“Yo, dwg mwngz ha.” Nyaenma ngaezvaeg dwk yawj muilwg, muilwg cukcak cik fwngz,fid cik fwngz deng gaem haenx naeuz:“Baezhaenx mbouj louz saek di cingzmienh, gyaep gou ok mbanj daeuj, haih gou mboujmiz ranz youq, couh dwg mwngz lo.” Nyaenma doeksaet, dwg de, laxlawz dwg de.

Nyaenma raen mboujmiz muengh lo, nyaenx mbouj ndaej daej hwnjdaeuj, daej dwk siliengz supsup, daej dwk dungxcieg saejcieg. Raemxda riengz naed fwn doek roengz gwnz ndang bae. Sawqmwh, douqlwg dawz mbaw ngaeux he muengz- hoebhoeb ganj daeuj, bang nyaenma cw fwn dangj rumz. Nyaenma riu lo, de gamj daengz gig sim’onj, de menhmenh hai bak:“Mwngz vihmaz doiq gou baenz ndei, mwngz mbouj lau gou ma?”Douqlwg dwggyaez dwk naeuz:“Daxmeh naeuz, boux vunz daeuj lajbiengz, hainduj cungj dwg simsienh law. Gou raen mwngz mbouj lumj dwg vunzvaih.”

Couh dwg coenz “gou raen mwngz mbouj lumj dwg vunzvaih”, hawj nyaenma youhcaiq miz saenqsim hwnjdaeuj, doeklaeng, nyaenma caeuq douqlwg bienqbaenz baengzyoux ndei. Nyaenma caeuq douqlwg guh baengz- youx le, ciemhciemh bienq simlangh, ciemhciemh bienq dwggyaez……

Baengzyoux dwg gijmaz? Baengzyoux couh dwg mwh mwngz siengsim seiz, bang mwngz dangj rumz cw fwn, baengzyoux couh dwg mwh mwngz muenghduenh seiz, nai mwngz. Cingj mwngz insik baengzyoux mwngz, nyinhcaen doiqdaih baengzyoux mwngz, caensim doiqdaih baengzyoux mwngz.

(haj nienzgaep Veiz Gangh)