Viuhliux roengzmaenh aen fuengcim neix, Veiz Gozcingh bae daengz dieg lawz, ceng mbouj lai cungj aeu caeuq gij goengdaeuz dangdieg doxyaeng gij saeh baenzlawz ciuq gij cingzgvang bonjdieg mbouj doengz vunz haenx bae ra banhfap anbaiz swnghcanj, fazveih gij ndei bonjdieg.

Bi 1964 seizcin, de caeuq swcigih fucujsiz giem giveij cujyin Lij Yinhdanh bae daengz Dwzbauj、Nazboh、Cingsih、Lungzlinz、Sihlinz、Denzlinz caeuq Baksaek daengj 7 aen yienh. Boux suhgi diveij Baksaek Yangz Lez、boux fusuhgi Cwng Saudungh, faenbiek buenxdoengz ngonzcaz, moix daengz aen yienh ndeu, Veiz Gozcingh cungj cam: Gij saehsaed yienh sou dwg maz, gij ndei dwg maz, gij yaez youh dwg maz, baenzlawz youq cengndaej haeux ndaej demsou doengzseiz, ciuq cingzgvang bonjdieg ra deng fuengfap, fazveih gij ndei bonjdieg, guh ok engqlai gung’yen hawj guekgya.”

Cingsih Yenveij suhgi Vangz Siujlinz gyoeblwnh gyoengqde ciuq saehsaed bonjdieg ra deng fuengfap doiq gij cidu gengndaem haeuxgwn haenx guh sawqniemh gaijgwz, youz haeuxsonggeiq gaij baenz geiq haeuxyangzcaeux caeuq geiq haeux- laeng. De naeuz: “Ndaem haeuxyangz gonq, yungh raemx noix gvaq ndaem haeuxcaeux, yienghneix hab gij daegdiemj Cingsih seizcin noix raemxfwn haenx, ndaem haeuxyangz ne vanzlij ndaej beij ndaem haeux- caeux daezgonq doekceh caeuq sougvej, doiq haeuxlaeng ciengj ndaej geiqciet mizleih; doengzseiz, saed- hengz raemx hawq doxlwnz ndaem, lij ndaej gaijndei namh, gemjnoix gij bingh haih non haih. Dingz cidu gengndaem neix okonj oklai gvaq ndaem haeuxsuenggeiq, dou yaek youq daengx yienh doi’gvangq.”

(caengz sat)