(ciep geizgonq)

Cawx Nienzhuq

Miz bi ndeu, Daeggaenx bang boux caizcawj dajgoeng, yaek gvaq cieng lo, caizcawj siengj bwh di laeuj noh, caj gvaq cieng seiz gwnndoet baez ndeu.

Boux caizcawj neix mboujdanh vunz doeg, lij gig ged dem. Daeggaenx yienznaeuz ngoenz guh hong daengz laep, hoeng cix cij ndaej gwn haeux lw byaek lw. Daeggaenx gig ndaenq, gig siengj coih caizcawj baez ndeu, hoeng cungj mbouj miz gihvei.

Ngoenz ndeu, caizcawj heuh Daeggaenx bae gai cawx bak duz bit caeuq haj duz yiengz, Daeggaenx ciep ndaej cienz le, couh okdou lo.

Daeggaenx doq byaij ndaw sim doq ndaq naeuz:“Ndaek daingunh neix, mbat neix gou couh hawj mwngz raen fangz bae!” Daeggaenx bingzseiz cungj dwg nyaengq guh hong, mbouj miz hoengq bae gai youz gvaq, baez neix dwg aen gihvei ndeu. Ngoenzneix dwg ngoenzhaw, gwnz gai vunz bae vunz dauq, caezgya cungj nyaengq dwk cawx nienzhuq, gig nauhyied. Daeg- gaenx mbouj muengz saek di, de sing- saeq gag eu fwen, menhnyednyed dwk youz gai, yawj nauhyied. Mbwn haemh lo, de cij cawx aen bakbit ndeu caeuq gaiq hajyiengz iq ndeu dauqma.

Daeggaenx baez haeuj douranz, caizcawj couh ndaq naeuz:“Mwngz daeg fangzdai neix, baenzlawz daengz seizneix cij ma?” Daeggaenx mbouj vueng mbouj muengz han naeuz:“Lauxyez, yaek daengz cieng lo, gwnz gai vunz lai vunz daih, lijdwg gou vunz cinglingz cij caenx ndaej haeuj bae ni.”

Caizcawj mbouj siengj dingq Daeggaenx gejnaeuz, de raen Daeg- gaenx song fwngz byouq dauqma, couh cam:“Nienzhuq ni?”

Daeggaenx lijdwg mbouj vueng mbouj muengz dwk daj ndaw daeh mbon song bau aeu mbaw makceij suek aen bakbit caeuq gaiq hajyiengz haenx okdaeuj, song fwngz yienh hawj caizcawj

Caizcawj baez yawj, engq ndatheiq dwk ndaq naeuz:“Ndaek fangzdai mwngz, gou dwg heuh mwngz cawx bak duz bit caeuq haj duz yiengz, mwngz baenzlawz cawx bakbit caeuq gaiq hajyiengz ndeu ni? Mwngz naeuz!” Caizcawj faekcam Daeggaenx.

Daeggaenx ndaw sim amq riu, hoeng cix mbouj gamj riu okbak, de lijdwg mbouj vueng mbouj muengz naeuz:“Lauxyez ha, mwngz vihmaz mbouj gangj cingcuj ni?”

Caizcawj yawj aen bakbit caeuq gaiq hajyiengz neix, bak ajloengh- loengh cix mbouj rox gangj gijmaz ndei, cijndei youh baij Daeggaenx caiq bae cawx, de yiemz dwk naeuz:“Mwngz caiq cawx loek, biennaeng doiq mwngz couh mbouj nyienghcingz laha!”

“Rox lo!” Daeggaenx baez ok dou couh lumj daejdin hoz youz nei, yaep he couh mbouj raen vunz lo. De dawz gij cienz caizcawj bae faen hawj doengh bouxhoj mbouj miz cienz gvaq cieng haenx lo.

Hwnj Ronghndwen Bae

Miz bi ndeu, Mbanjgaeumax miz goenglaux he baenz bingh lo, aenvih ranz hoj mbouj miz cienz yw bingh, yawjraen bingh yied daeuj yied naek. Daeggaenx rox le, gig doengzcingz, de dawz swhgeij bingzseiz dajgoeng gai fwnz rom ndaej di cienz haenx dawz bae hawj goenglaux cawx yw, hoeng cix cungj mbouj raen bingh ndei saek di. Doeklaeng, de dingq vunz naeuz, cungj bingh neix aeu cungj yw heuh“gveiqbeiz” ndeu daeuj yw cij ndei, danh cungj yw neix cijdwg gwnz ronghndwen cij miz, dwg cungj ywsien dahsau Cangzngoz ndaem ndeu. Haujlai vunz cungj dingq gangj lo, hoeng cix mbouj miz byawz gamj hwnj bae. Daeggaenx rox aen siusik neix le, couh cam ndei baenzlawz hwnj ronghndwen bae. Laxlawz diuzloh doeng gwnz ronghndwen dwg mbaeklae baenz mbaek baenz mbaek, vunzlai heuh de guh “laembwn”, cijmiz boux simndei cij hwnj ndaej bae.

Ngoenz daihngeih, Daeggaenx haidin lo. De daiq fagfouj ndeu caeuq aen daeh ndeu, daeuj daengz giz “laembwn”. De riengz dwk “laembwn” bin hwnj bae, naeuz daeuj hix geizheih, baez yaep da, Daeggaenx couh bin daengz gwn ronghndwen bae lo. Laxlawz “gveiqbeiz” couh dwg raeuz youq gwnzbiengz ciengz yawjraen ndaw ronghndwen go faexgveiq hung haenx. Daeggaenx sikhaek dawz fagfouj daeuj, “caca” geij mbat, gveiqbeiz couh doek roengzdaeuj lo. Daeggaenx gig angq, muengz gip gveiqbeiz coq daeh bae couh dauqma lo.

Daeggaenx dauqma le, doq diemj feiz cienq yw bang goenglaux yw bingh. Goenglaux gwn yw le, gvaq geij ngoenz bingh couh ndei lo, daengx ranz vunz cungj docih Daeggaenx.

Daeggaenx rox cungj yw neix gig dijbauj, gvaq geij ngoenz de youh hwnj ronghndwen bae cam dahsau Cangzngoz aeu haujlai ceh faexgveiq vanq roengz gwnzbiengz daeuj, daengx bya daengx lueg sikhaek maj rim faexgveiq heuswdswd. Gwnzbiengz daj seizhaenx hwnj couh miz faexgveiq lo.

Daeggaenx hwnj ronghndwen bae ra yw bang bouxhoj yw bingh, gienh saeh neix deng boux caizcawj rox lo, caizcawj gig da’nding, naeuz rongh- ndwen dwg de guenj, Daeggaenx caeg gij “ywsien” de, mauhfamh de. Caiq gangj, boux caizcawj neix deng Daeggaenx coih gvaq, seizneix raen Daeggaenx hwnj gwnz ronghndwen bae ra yw bang bouxhoj yw bingh, rox Daeggaenx youq gwnzbiengz dwg boux ak ndeu, doiq de mbouj miz leih, yienghneix de couh swnhgei naeuz Daeggaenx caeg gij “ywsien” de, baij vunz bae cug Daeggaenx, yaek soengq Daeggaenx bae gwnz daengngoenz coemh dai. Daeggaenx youh gik youh hozndat, de siengj aen banhfap ndeu okdaeuj. Caizcawj dawz Daeggaenx at gaenh daengngoenz seiz, gaenq ndat dwk daengx ndang dwg hanh, mbouj gamj caiq byaij bae naj lo, hoeng Daeggaenx cix cang nit, ndang saenzfoebfoeb. De doiq caizcawj naeuz:“Lauxyez, gou nit yaek dai lo.” “Yaek hawj daengngoenz remj dai mwngz, mwngz cix raen nit, yienghneix couh soengq mwngz daengz gwnz rongh- ndwen bae ba.” Caizcawj raen Daeggaenx nit dwk saenzfoebfoeb, muengz dawz de soengq daengz gwnz ronghndwen bae. Daeggaenx daengz gwnz ronghndwen le, youh daegdaengq daih sing hemq naeuz: “Ndat dai lo, ndat dai lo!”Caizcawj haep da’nou de yakriri naeuz:“Gou yawj mwngz mbat neix dai mbouj dai!” Gangj le couh dauqma lo. Caizcawj lau Daeggaenx cengq hai cag buet ma, couh heuh vunz dawz lamh raemj goenq. Daeggaenx youq gwnz ronghndwen yawj ndaej cingcing cujcuj, gig ndatheiq, de dawz cag cug fwngz de doiq dwk ndaek rin henz aen ronghndwen muz goenq bae, yienzhaeuh gingz ndaek rin hung ndeu, doiq dwk gyaeuj caizcawj dub roengzbae, caizcawj lij caengz rox dwg gijmaz saeh, couh deng Daeggaenx dub dai lo.

Daeggaenx yienznaeuz ma mbouj ndaej ranz lo, hoeng de vih bouxhoj coih boux caizcawj guh doeg guh yak neix, youh yw ndei bingh bouxhoj, ndaw sim hix gig vaiqvued. Vihneix, moix ndwen co’it cibhaj mbwn hai seiz, de cungj dwg ndwn youq henz gogveiq gwnz ronghndwen, riu- nyumnyum yawj dwk gij gingjsaek gyaeundei gwnz biengz.

(sat)