□ Hoz Saubangj sij Cinz Siengzcouh Liuz Gingliuj Cinz Siengzgen hoiz

Bi 1963 ndwen 2, Gih Dangjveij cienmonz doiq aen vwndiz neix sij faenh baugau hawj Cunghnanzgiz caeuq Cunghgung Cunghyangh, ciuq saehsaed fanjyingj le gij cingzgvang Guengjsae, daezok gij yigen doiq fuengcim Guengjsae guh nungzyez swnghcanj haenx.

Bi 1964 ndwen 3, Cunghgungh Cunghyangh fucujsiz、Daengx Guek Yinzda Cangzveijvei veijyenzcangj Cuh Dwz ngonzcaz Guengjsae, doiq Guengjsae baij ndei vut yaez, ciuq cingzgvang gak dieg mbouj doengz haenx ceiqdingh banhfap bae hwnjguh nungzyez dingz fuengcim neix gig dingjrengz. De lizhai Guengjsae le sij baugau hawj dangjcunghyangh naeuz: “Gij dungzci swcigih nyinhnaeuz, daj gij saehsaed Guengjsae okdin, guh ndei swnghcanj haeuxgwn doengzseiz, ceiq ndei bae guh lai cungj gingh- yingz, daegbied dwg ndaem gij doenghgogai yayezdai. Hoeng aenvih geij bi neix ok haeux hwnj mbouj bae, lai cungj ginghyingz caemh hwnj mbouj bae. Vihliux caenhvaiq hawj lai cungj ginghyingz ndaej guh hwnjbae, gyoengqde muengh youq song bi neix, gemjmbaeu roxnaeuz mbouj caiq demgya hongrap diuh haeux hawj diegrog. Lai cungj ginghyingz guh ndei le, couh ndaej lai diuh di huqndoeng’ok、huqlanghciengx caeuq huqdoj daengj huq youqgaenj okbae, gijneix gyaciz sang gvaq haeux. Gai hawj guekrog le ndaej vuenh ma engqlai haeuxgwn, hoeng caemh aeu yiendoengh daengx gih……Gangj daengz reguek, Guengjsae cugbi rom di haeux caemh dwg bietaeu.”

Seizhaenx, aenvih haeuxgwn daengx guek miz gizvauq, caenhguenj cunghyangh mbouj ndaej gemjmbaeu gij hongrap Guengjsae diuh haeux hawj baihgwnz, hoeng Guengjsae vanzlij dwg youq baujcingq haeux ndaej onjdingh demcanj doengzseiz, aeu siengj banhfap mbefat doenggogai、hongciengxlangh caeuq hongndoeng- faex, fazveih gij ndei bonjfaenj okdaeuj.

(caengz sat)