Doxgauq

Gaxgonq miz daeg mbauq Bouxcuengh ndeu heuh Daeggaenx, de daj iq couh gyax boh gyax meh, dwg daegdog liuzlangh ndeu. Daeggaenx vunz coengmingz cinglingz, bungz saeh rox baenzlawz doiqdaih, de cienmonz loengh coih vunzrwix, ndatsim bang bouxhoj bouxgungz. Ndigah, de daengz gizlawz cungj dwg sawj vunzyak vunzrwix gyaeujdoet, ndaej bouxhoj bouxgungz angqcaeux.

Daeggaenx youq ranz boux caizcawj dajgoeng seizbaenx, miz ngoenz ndeu, caizcawj naeuz ngaenz ndaw ranz deng caeg lo, ngeiz dwg Daeggaenx caeg, Daeggaenx mbouj fug, vih neix songde ceng dwk couh gauq daengz giz yienhguen bae.

Yienhguen dwg boux damguen ndeu, danghnaeuz dwg gij anq wnq, de baenz bi hix mbouj siengj bae swt, seizneix dingq naeuz dwg anq caeg ngaenz, laihnaeuz miz ndeicawq, couh sikhaenk ciep roengzdaeuj.

Ngoenz daihngeih haetromh, yienhguen couh heuh caizcawj caeuq Daeggaenx daeuj goengdangz doxdoiq. Daeggaenx rox, doxgauq coengzlaiz cungj dwg byawz miz cienz byawz couh miz leix, vihneix, youq gwnz loh seiz, de couh caegcaeg gip haujlai rinmaxluenzhau coq daehbuh bae, dawz song aen daehbuh coq ndaej bongzbwdbwd.

Daengz goengdangz le, yienhguen ciuqlaeh heuh bouxgauq sien gangj. Dang caizcawj gvih roengz gangj seiz, Daeggaenx saenzheiq dwk ndwn youq henz, daegdaengq seiz mbouj seiz dawz gij rinmaxluenz ndaw daehbuh loengh ndaej yiengjgoggog. Sing yiengj yinxhwnj yienhguen haeujsim, song cehda yienhguen lumj danou nei caegcaeg yawj song aen daehbuh bongzbwdbwd Daeggaenx, sim ngeix, neix itdingh dwg Daeggaenx siengj ndaej hingz aeu cienz daeuj gingq gou. Caiq yawj caizcawj, song aen daehbuh baebbebbeb, gij vah ndawde hix mbouj miz saek di eiqsei dwg naeuz yaek gingq de, baenzneix siengj le, yienhguen couh huj lo, caengz caj caizcawj gangj sat, de couh bongx daiz hat naeuz:“Haep bak, mwngz ndaek vunz ledged neix, dawz ngaenz yawj ndaej beij mingh bengz, baenzlawz ndaej seizbienh hawj vunz caeg bae ni? Faenmingz dwg luenh gauq vunzndei. Daeuj, dawz de rag roengzbae moeb haj cib mbat, gyaep ok yazmonz bae!”

Caizcawj deng moeb dwk heuh boh hemq meh, Daeggaenx yawj le caeg riu. Dang caizcawj deng gyaep ok yazmonz bae le, yienhguen riunyumnyum doiq Daeggaenx naeuz:“Daeggaenx, gou gaenq bang mwngz ok gaemzheiq lo, mwngz wnggai docih lauxyez gou laba?”

Daeggaenx hix riu naeuz:“Docih lauxyez mingzduenh, danghnaeuz ngoenzneix lauxyez banh ndaej mbouj goengcingq, gij rin song aen daehbuh gou couh dawz gyaeuj lauxyez moeb dek bae lo.” Gangj sat, de couh dawz gij rinmaxluenz mbon okdaeuj vut youq goengdangz, cingsaenz gvaek- gvaek byaij ok dou bae.

Yienhguen yawj gij rinmaxluenz gwnz namh, hozndat dwk ngunh gvaqbae lo.

Cingjhek

Miz bi ndeu, ndwencieng cosam, ciuq fungfug dangdieg, ngoenzneix ceiq nauhyied, beixnuengx baedauq, dox cingj hek dox soengq laex.

Bohnaxbiuj Daeggaenx dwg boux mizcienz hoeng cix gig ged ndeu, de cungj dwg yawjsiuj bouxhoj, hoeng youh gig aeunaj, ngoenzneix, de hix cingj Daeggaenx bae ranz de gwncieng. Haeuj daiz seiz, Daeggaenx raen gwnz daiz baij rim noh byaek, sim ngeix: Ranz bohnaxbiuj gvaq cieng gwn can haeux couh cawj baenzlai byaek, doengh bouxhoj dou cix ra diemj youz cawj byaek hix mbouj miz, yienghneix gwn haeux seiz, de swnh vunz mbouj haeujsim, couh nep nohbit nohgaeq coq song aen daehbuh bae, dawz baema soengq hawj bouxhoj. Doeklaeng miz vunz baklai, dawz gienh saeh neix cienz daengz rwz bohnaxbiuj bae, bohnaxbiuj sim’in nohbit nohgaeq de, hoeng youh mbouj eiqsei naeuz, couh siengj banhfap boizhaemz Daeggaenx. Ngoenz ndeu, de doiq Daeggaenx naeuz:“Daeggaenx, boh- naxbiuj ngoenzcog hix bae ranz mwngz baiqnienz.”

Ngoenz daihngeih, Daeggaenx vih dakdaih bohnaxbiuj, doeng ra sae comz cungj suenq cawx ndaej duzgaeq iq ndeu、duzbit iq ndeu caeuq gaen lai nohmou, de dawz gij noh gij byaek loengh ndaej rangfwdfwd, youh cingj geij boux baengzyoux daeuj guhhek. Gwn haeux seiz, bohnaxbiuj hix caegcaeg dawz gij nohbit nohgaeq oet roengz daehbuh swhgeij bae. Daeggaenx dwg boux cinglingz, caeux couh yawjraen bohnaxbiuj caeg noh lo, de ndawsim amq riu, cij dwg mbouj guhsing. De caeuq baengzyoux vuenh diegnaengh, de doq hawj bohnaxbiuj gingq laeuj, doq caegcaeg daek raemxdang dauj roengz daehbuh bohnaxbiuj bae, lij yaengyaeng naeuz:“Gwnz hix gwn, laj hix gwn, gwnz goj ndoet, laj goj ndoet!” Bohnaxbiuj roxnyinh geizheih, cam de:“Daeggaenx, mwngz gangj gijmaz?”Daeggaenx riu naeuz:“Mbouj miz gijmaz, mbouj miz gijmaz.” Gangj le youh hawj bohnaxbiuj gingq laeuj, laebdaeb daek raemxdang gwnz daiz dauj roengz daehbuh bohnaxbiuj bae, yienzhaeuh daihsing hemq naeuz:“Aeya, bohnaxbiuj, daehbuh mwngz baenzlawz miz raemx ndik okdaeuj ni?” Seizneix bohnaxbiuj cij rox mimiz de deng Daeggaenx fatyienh lo.

Bohnaxbiuj najmong dwk rwz nding liux, de daengx Daeggaenx da ndeu le, dawz gij nohbit nohgaeq ndaw daeh mbon okdaeuj, lij cang huzduz naeuz：“Dwg ndaek cangjmax lawz dawz gij noh coq roengz daehbuh gou daeuj?” Daeggaenx caeuq geij boux baengzyoux cungj riu lo. Daeggaenx yawj gij yiengh diuqgah bohnaxbiuj, riu naeuz:“Bohnaxbiuj, gaej mbon lo, di byaek neix mwngz couh ce baema ranz ba!” Bohnaxbiuj najnding dwk mbouj ndei eiqsei naeuz:“Mbouj yungh lo, ranz gou miz haujlai ni.” Gangj le najmongmet byaij ok dou bae lo.

(caengz sat)