Geij ngoenz gonq, Sanhgyangh Dungcuz Swciyen comz ndaw yienh Linzhih、Bazgyangh、Duzdung daengj yangh(cin) 18 boux lauxhangz Dungyoz、boux vwnzyi ndawbiengz caeuq boux hag Dungvwnz daengj doengzcaez doxyaeng baenzlawz roengzcienz caenhrengz ciengjgouq vwnzyoz bak riuz Dungcuz, comz vunzlai ok geiqmaeuz swnjcienz vwnzyoz bak riuz Dungcuz cungj vwnzva gig dijbauj neix.

Dungcuz dwg aen saujsu minzcuz he, gag miz gij vwnzva minzcuz ndawbiengz, lumj Gvanjswz、Bizbazgoh、Dagoh、Yehgoh、Sanghgoh、Hozbenhgoh daengj, suenq Yehgoh Dungcuz ceiq hoengh. Hoeng, seizneix vwnzva minzcuz cingq deng dongjcung bienq nyieg, bouxcoz okrog guhhong, liz vwnzva minzcuz swhgeij yied bae yied gyae, canghfwen、bouxfwen cug ngoenz geq bae, neix hawj soucomz、ciengjgouq vwnzyoz ndawbiengz gaenq baenz gij hong ceiq haenq.

Gaenh bi daeuj, aen yienh neix minzyijgiz baengh Dungvwnz aen bingzdaiz ndei neix, gonqlaeng camgya caemhcaiq coengh Swcigih Gujcizban bien ok《Gvanjswz Dungcuz》nem《Bizbazgoh Dungcuz》daengj saw, seizneix youh roengz- rengz cujciz vunz soucomz cingjleix Sanghgoh nem Yehgoh Dungcuz, caemhcaiq ndaej Swcigih Gujcizban haenqrengz bangcoengh, gujcizban bineix bued 5 fanh maenz hawj aen yienh neix guh cienzngaenz soucomz, caemhcaiq dawz《Yehgoh、Sanghgoh Dungcuz》lied haeuj benhciz okbanj giva.

Bonj saw neix dajsuenq sij 100 fanh cih, youz Gvangjsih Dungcuz Yozvei Veicangj Vuz Hau dang cungjguvwn, Swcigih Gujcizban lingjdauj dang hanghmoeg cujbenh, aeu Sawgun geiq yaem Vahdungcuz、gozci yinhbyauh、Dungvwnz、cigsoh fanhoiz、eiqsei cungj fuengsik neix baiz, haenqrengz guh daengz geiq cinj、fanhoiz caezcienz, yaek youq 2015 nienz okbanj.

(Vuz Meijlenz Gungh Bujgangh)