Vih sawj Cuengh Gun song vah saw sonhag guh ndaej engq ndei, 10 nyied 15 hauh, Vujsenh Yen Gyauyuzgiz youq ndaw yienh Dungzlingj Cin hai beizyinbanh son Cuengh Gun song vah saw lauxsae. Aen beizyinbanh neix banh daengz nienzdaej, hwnjdangz seizgan gungh miz 10 ngoenz. Daengx cin gak siujyoz yaucangj、gyaudauj cujyin caeuq Cuengh Gun song vah saw lauxsae daengj daihgaiq 40 vunz camgya beizyin. Baez beizyin neix cujyau son “minzcuz yijvwnz cwngcwz”、 “Sawcuengh gocwngz byauhcunj”、 “Sawcuengh gihcuj cihsiz”、 “Sonfap Cuengh Gun song vah saw”. Ndawde miz lingjdauj, hix miz boux guh Sawcuengh caixhangz haenx daeuj guh beizyinbanh lauxsae. Dungzlingj Cin Sawcuengh fujdaujyenz Luz Mingzdiz dang beizyinbanh banhcujyin. Yienh gyauyuzgiz fugizcangj Lij Cangcinh、yienh Sawcuengh yozyau yaucangj Cinz Fucau camgya haiban denjlij caemhcaiq gangjvah. Ndaw doz dwg haiban denjlij yienhciengz.

(Ganh Sozvwnz Luz Mingzdiz ingj)