Seiziq ceiq vaiqlag, hoeng ndaw vaiqlag saekmwh hix miz siengsim caeuq nyapnyuk. Gou caemh yiengh- neix.

Geiq ndaej miz baez he, daxmeh nyib moeg, gou caeuq daegnuengx guhcaemz. Dou guh duzyiuh gaeb gaeqlwg. Gou caeuq daegnuengx cai gienz, byawz saw byawz couh dang duzyiuh. Daegnuengx saw lo, de gaeb gou. Gou haenqrengz buet, daeg- nuengx baenzlawz hix gyaep mbouj ndaej gou. Daegnuengx gvai, boemz youq gwnz mbonq. Gou laihnaeuz daegnuengx daej lo, couh ganjgaenj buet gvaqbae yawj. Daegnuengx sikhaek baenq ndang gvaqdaeuj gaeb gou, gou raen gou couh yaek deng de gaebdawz lo, gaenjcieng hwnjdaeuj, buet hwnj gwnz fan moeg daxmeh cingq nyib haenx bae. Daxmeh ndatheiq dwk naeuz:“Mwngz dahniq neix, caen mbouj dingqgangj. Mbouj son daegnuengx lij daiq de luenh guh dem. Okbae, fad mwngz ndwn bakdou.”Gou lau dwk lauxlaux saedsaed bae bakdou ndwn, mbouj gamj doengh saek di, ngawzsoebsoeb yawj daegnuengx swhgeij guh’angq. Sawqmwh daegnuengx mbouj siujsim naengh roengz gwnz moeg daxmeh bae. Gou caegcaeg riu, sim siengj: Baezneix daegnuengx hix yaek deng fad daeuj buenx gou ndwn lo. Byawz rox daxmeh dauq umj daegnuengx hwnjdaeuj, rubluh aen’gyaeuj daeg- nuengx naeuz:“Baujboiq ha, mwngz mbouj in ba?”Gangj sat lij riunyum- nyum cup daegnuengx mbat he dem. Youh gangjunq naeuz:“Bae bangx- henz guhcaemz ba, youq neix guhcaemz rox deng cim coeg ne.” Daegnuengx vaiqvet buet lo. Lij gikheiq gou naeuz:“Daxmeh, mwngz caen ndei, gou gyaez mwngz!”Gou saedcaih nyaenx mbouj ndaej lo, ndatheiq dwk naeuz:“Biensim!” Daxmeh mbouj dawz haeuj sim dwk naeuz:“Daegnuengx lij iq ne.” Gou caeuq daxmeh ceng hwnjdaeuj, yienzhaeuh buet haeuj rug swhgeij bae daejngo’ngo. Gou daegbied haemz daegnuengx: Danghnaeuz mbouj miz daegnuengx, daxmeh haengjdingh daegbied ndiep gou. Gou doq daej doq dauqngeix gaxgonq daxmeh ndiep gou gij vuenyungz haenx, gou geijlai maqmuengh seizgan ndaej byonj dauq gaxgonq ha! Geijlai louzlienh mwh mbouj miz daegnuengx haenx ha!

Neix couh dwg gij nyapnyuk gou. Aenvih daxmeh daiq biensim lai, gou ciengzciengz caeuq daxmeh doxceng. Gou geijlai maqmuengh daxmeh mbouj biensim ha.

(haj nienzgaep Gi Yijfeih)